Nalzaro: Kawat og kuryente

KON atong tuho-an kining kasong electricity pilferage gipasaka sa Visayan Electric Company (Veco) batok sa Waterfront Hotel and Casino Lahug ngadto sa Cebu City Prosecutor’s Office, maka-ingon tang pagkadako kining kawat sa kuryente. Morag dili kita makatuo no nga usa ka five star hotel mangawat lang og kuryente.

Abi ba nako og ang mga ordinaryong consumer lamang ang mohimo og illegal tampering.

Matod pa sa Veco nga nagsugod kining gihimong illegal tampering sa Waterfront Hotel niadto pang 2007 hangtod nga nadiskobrehan kini niadtong Pebrero ning tuiga. Matod pa nga wala gi-agi sa ilang electric meter ang supply sa kuryente sa ilang hotel hinungdan nga wala morehistro ang consumption niini. Gibana-bana sa Veco nga mo-abot ngadto sa P168 million ang balor sa kuryente nga nakawat sa Waterfront. Pagkadakong uwaw ani, five star hotel mangawat og kuryente.

NGANONG WALA PUTLI?

Usahay makita nato sa mga newspapers ang dagway ug pangalan sa mga tawo nga nangayo og public apology gumikan kay nangawat og kuryente. Unya kana sila giputlan dayon  og supply.

Apan ngano kining Waterfront Hotel nga nangawat gyud wala man lagi dayon putli sa supply? Unsa man duna sab diay pagpihig kining taga Veco?

Maayo lang mogukod sa mga gagmay’ng konsumidor. Apan sa mga dagkong kompaniya nga klaro gyud nga nangawat, ikiha pa.

Kriminal kining maong kaso. Ambot og duna bay mapriso ani gawas nga makakolekta ang taga Veco sa maong kantidad. Pero kasagaran gud ani morag mahulog nga adunay compromise agreement. Bayaran lang ang utang, dismiss na ang kaso. Pero mas maayo gyud nga adunay makalabuso para madisiplina gyud kining mga mo-tamper og kuryente.

NAGPAKABANA

Insakto kining panawagan sa Kapitolyo ngadto sa mga environmentalists kuno o kanang grupo nga nagpakabana sa kalikupan nga motabang sa pagbantay aning mga tawo nga nag-abuso sa atong kina-iyahan sama aning pagpamutol og kahoy.

Kini gong pagpakabana sa kalikupan, daghan kaayo kining aspeto. Dili kanang pollution nga maoy kanunay gisunggal aning mga nagpatuo-tuo nga mga environmentalists.

Maayo man lang god ni silang mobantay anang Korean Electric Power Plant (Kepco) diha sa Naga nga mobuga og coal ash. Wala sila makamatikod aning gihimo sa ubang mga developers sama anang Monterrazas de Cebu diha sa bukid sa Guadalupe nga na-upaw na kanang atong kabukiran og daghan ang ma-apektuhan nga nanimuyo sa ubos nga bahin panahon sa ting-uwan. Unya naa pay grupo nga mamutol og kahoy bisan man gani ang taga public works and highways gipasanginlan. Apilon unta na sa ilang kawsa.