Obenieta: ‘Gasa-basa’

Sunday, December 4, 2011

PAKLION na pod hapit ang panid sa tingtapos nga tuig. Hagbay ra gasugod ang kurambos sa kahinam ug ngilngig nga pangandam sa kadaghanan. Bitaw, magdilaab gyod gihapon ang pagsaulog sa Pasko taliwala sa katugnaw bisan pa’g daghang gatuskig sa kalisod ang kinabag-an.

Bisan pa’g sagad kontrabida ang kahigayonan ug wala’y bag-ong ikaasoy aron kita makakab-ot na gyod sa bitoon sa kauswagan, dayag gihapon ang pagtuo nga moabot ra unya ta ugma damlag sa hayag nga hugna sa atong katilingbanong sugilanon. Nindota kaha kon,  sama sa libro ni Lola Basyang, ang kasadya mopagtigbabaw ra sa ulahing bahin batok sa tanang subo ug kurat nga panghitabo.

Have something to report? Tell us in text, photos or videos.

Kon mahidangat ug masinati nato puhon ang kalamposan, hala, wala’y pagduha-duha nga kana mao’y labing nindot nga pinaskohan.

Kabahin sa gasa nga labaw pa sa mga bahanding butang, labing malungtaron gyod ang pagsanag sa kahimatngon, kahibalo, ug kaalam. Mao’y hinungdan nga kon duna ta’y dunolan og bulawanong gasa, layo’g maabtan ang makadawat og libro.

“A book is a gift you can open again and again,” matod pa sa magsusulat nga si Garrison Keillor. Ang libro kuno usa ka gasa nga mahimong imong usbon-usbon pag-abli.

Tuod man, kon motuhop gyod sa alimpatakan ang nabasahan ug nakat-onan, wala’y kinutoban gyod ang nahagdaw nga kaayohan.

Mao bitaw nga dalaygon gyod ang gibuhat ni Rep. Luigi Quisumbing (Cebu, 6th district) dihang nakig-alayon siya sa Department of Education ug Children International, usa kanongovernment organization (NGO), aron idalit ang 40,000 ka mga imported textbooks ngadto sa mga pampublikong tunghaan sa dakbayan sa Mandaue.

Iyawat na lang, matod pa ni Quisumbing, nga makatabang ang mga gidonar nga libro pagpataas sa kabangkaagan diha sa iyang distrito. Nidugang siya pag-ingon nga ang mga basahon gikan sa gawas sa nasod duna’y sarang gahom pag-umol sa mga tinun-an aron mahimong “model citizens” sa ilang pagtubo.

Bitaw, bililhon gyod kaayo ang gipang-apod ni Quisumbing ug sa Children International kay gawas nga nihit kaayo ang libro alang sa mga kabos nga tinun-an sa mga publikong tunghaan, nabulit pa gyod kini sa mga sayop nga kasayoran ug bakikaw nga pagsulat niini. Gani, sayod ta nga daghan ang mga panawagan sa kagamhanan aron usbon ug tul-iron nga mga kahiwian sulod sa mga textbooks nga gitunol ug gipangbawi sa kadagkoan sa Department of Education.

Ning panahon sa paghinatagay, hinaot timan-an nato kon kinsa’y labing gakinahanglan ug kon unsa’y idalit nato nga angay ug tunhay tadlas sa katuigan.

(geemyko@gmail.com)