Espinoza: Sayo nga pinaskohan sa taga Gibitngil

Monday, December 5, 2011

GASA. Ang mga lumulupyo sa isla sa Barangay Gibitngil, Medellin, Cebu maoy nag-unang nakadawat sa pinaskohan nga bugas ug delata gikan ni Kong. Benhur Salimbangon sa kwarto distrito sa Sugbo.

Niadtong Sabado, si Kongresista Salimbangon uban ni Medellin Mayor Ricky Ramirez, ang grupo sa Water Buffalo Golf club ug ning nagsulat nanghatag og bugas ug mga delata sa matag pamilya sa Gibitngil.

Have something to report? Tell us in text, photos or videos.

Morag nagpista ang taga Gibitngil pag-abot ni Kongresista Salimbangon, Mayor Ramirez ug mga kauban didto sa basketbolan sa maong barangay. Si Capt. Soponias Sinambong ug iyang konsehales maoy misugat kanila ni kongresman ug mayor.

Si Mayor Ramirez ug Kongresista Salimbangon mihatag og pakigpulong sa usa ka mubong programa usa gitunol ang mga gasa sa katawhan. Kapin sa 500 ka bubong ang namuyo sa Gibitngil, gamayng isla nga nag-atubang sa Kawit, Medellin.

Di matukib ang kalipay sa mga nakadawat sa gasa gikan ni Kongresita Salimbangon.

Mihayag usab ang nawong sa taga Gibitngil human sa pung ni Mayor Ramirez nga mabutangan na og solar power ang isla nga gipalit pinaagi sa CDF ni Kongresista Salimbangon.

Si Kongresista Salimbangon inabagan sa Water Buffalo Golf club, pinangulohan ni Edwin Salimbangon, nagpasiugda og 2nd Cong. Benhur Salimbangon Golf for a Cause niadtong Okt. 22 sa Mactan Island Golf Club. Ang kita maoy gipamalit sa gasang pagkaon alang sa mga nagkalisod nga dapit sa kwarto distrito sa Sugbo.

Human sa pagpanghatag sa gasa, gidala mi ni Mayor Ramirez didto sa usa ka sitio sa Gibitngil diin iyang gihimong usa ka gamayng resort, nga iyang ginganlan nga Funtastic Island. Ang mga cottages nagtungtong sa mga dagko ug habog nga bato.

Pangisda ra ang gisaligan nga pangita sa mga lumulupyo sa barangay Gibitngil. Usa ni sa mga isla nga barangay sa kwarto distrito nga naglisod labina sa tubig og suga de kuryente. Gani wa pay dalan ang isla. Pumboat ra ang ilang transportasyon.

****

SAYO PA? Giunhan ni Mayor Mike Rama si Kong. Tomas Osmeña, ang hepe sa BO-PK, sa pagtanyag sa mga konsehales sa nagkalainlaing barangay sa dakbayan sa Sugbo nga modagan pagka konsehal sa dakbayan uban sa iyang linya.

Gipahimuslan ni Mayor Rama ang higayon sa pag-imbitar sa mga konsehales atol sa iyang pamung niadtong 2nd General Assembly of the Barangay Councilors’ League of the Philippines (BCLP)-Cebu City Chapter, Sabado sa gabii sa Waterfront Hotel.

Way panagana nga giimbitar ni Mayor Rama ang mga konsehal sa barangay nga modagan pagka konsehal sa dakbayan sa 2013 nga piliay uban sa iyang partido bisan sa presensya nila ni Kongresista Tomas, Kong. Cutie del Mar ug iyang amahan.

Mipasalig si Mayor Rama nga siya na ang mopaigo sa modagan pagka konsehal. Gipasaligan usab ni Rama nga madawat sa mga barangay kapitan ug konsehales ang ilang mga alawans sa di pa matapos ning tuiga.

Matod pa ni Mayor Rama nga bisan pa sa ilang panagbangi ni Kongresista Tomas ug Cutie del Mar di mahitabo nga mahiagum ang dakbayan sa ilang personal nga diperensya. Silang tanan nagmahal sa dakbayan sa Sugbo, dason pa ni Mayor Rama.

Sa unang higayon wa birahi ni Kongresista Tomas si Mayor Rama. Ang gibutyag ni Kongresista Tomas mao ang nga plano ni Mimo Osmeña, anak ni Lito Osmeña, nga modagan pagka gobernador, kongresista o di ba mayor sa dakong siyudad sa 2013 nga piliay.

Matod pa sa mga kritiko, ang pag-awhag ni Mayor Rama sa barangay konsehales ug kinsa ang gustong mouban sa iyang linya sa 2013 nga piliay uwahi na. Ang BO-PK sa pagka karon kumpleto na ang linya.

(elespinoza53@yahoo.com)