Mongaya: Smuggling sa armas

Monday, December 5, 2011

WA makalusot sa pantalan sa Sugbo ang laing kargamento nga mga pisa sa armas ug mga bala gikan sa Estados Unidos. Matod pa, tipik kini sa upat ka mga kargamento nga naabot sa Pilipinas ug ang duha didto moabot sa kaulohan. Usa niini ang nakalusot.

Buot ipasabot, duha na ang napakgang sa mga gipayuhot nga mga gidiling kargamento dinhi sa Sugbo nga gikan sa Estados Unidos.

Have something to report? Tell us in text, photos or videos.

Ngilngig ang mga smuggler kay nakalusot sa sobra ka istrikto nga Homeland Security sa US apan kulang ang kangilngig kay nasakpan ra man sab dayon dinhi sa atoa.

Ang nakalisod lang karon mao ang pagsubay kon si kinsa ang mga smuggler ug ang pag-andam sa mga ebidensya.

Sa pagkakaron, gisusi sa mga tinugyanan sa customs ang usa ka Nelson Arnoco nga giingong haoshaio nga maoy nipatuyok sa mga papeles aron makagawas unta ang maong mga kargamento.

Kon maminaw kita sa mga tsismis, usa ka dakong negusyanteng Insek ang nagpaluyo sa maong kargamento. Apan maghulat lang gyud kita kon kanus-a mahuman ang imbestigasyon, kana kon nidagan.

Ang ako lang nahibudngan kay sa panahon nga si Koko Holganza ang hepe sa Customs Intelligence and Investigation Service (CIIS), abtik kaayo kining makakuha dayon og mga impormasyon. Apan kining liderato nga niilis kaniya wa gyuy iwik nga gikinahanglan na man unta ang ilang expertise isip imbestigador. Matod pa, busy sa trabaho.

KAMPO NI RAMA

Sulod sa pila ka mga bulan, malingaw ko maghunahuna nga magsulat kabahin sa giingong kampo ni Mayor Mike Rama ug sa Bando Osmeña-Pundok Kauswagan (BO-PK).

Malingaw kay ang BO-PK dunay mayorya sa Konseho sa Sugbo ug mga kongresista. Ubay-ubay sab ang mga barangay kapitan.

Apan ang grupo ni Mayor Rama kutob lang gyud intawon sa usa ka konsehal nga iyang paryente ug mga paryente nga opisyal sa barangay.

Sa miaging semana, atong masabtan nga naninguha na si Rama sa pagpalig-on sa iyang kampo pinaagi sa pag-awhag sa mga kapitan nga gustong modagan alang sa mas taas nga posisyon dinhi sa Syudad sa Sugbo.

Iya kining gibuhat diha sa 2nd General Assembly sa mga Barangay Councilors’ League of the Philippines (BCLP) Cebu City chapter nga gipahigayon sa Waterfront Hotel. Ang mga gustong modagan alang sa mas taas nga katungdanan (buot ipasabot kon si kinsay gusto magkonsehal ug magkongresista) mosumiter sa ilang mga pangalan kang Rama.

Tan-awon nato kon unsay tubag sa BO-PK ug sa lider niini nga si Kong. Tomas Osmeña kay nagkainit ra ba gyud ang ilang panagbangi bisan layo pa ang piliay sa 2013.