Espinoza: Morag tawo-tawo si Mayor Rama

Monday, December 12, 2011

GIKAPNAN. Si Kong. Tomas Osmeña dugay na nga nakasabut nga kon ihatag sa konseho ang gipangayo ni Mayor Mike Rama nga P11.8 bilyon nga badyet alang sa tuig 2012 magamit ni ni Mayor Rama sa Mayo 2013 nga piliay.

Tungod sa posibilidad nga gamiton ni Mayor Rama ang parte sa P11.8 bilyon nga badyet sa tuig 2012 alang sa iyang pagpasubli sa Mayo 2013 nga piliay, P5.2 bilyon ra ang giaprobahan sa mga alipores ni Kongresista Tomas sa konseho.

Have something to report? Tell us in text, photos or videos.

Gikapnan og kapin sa tunga ang gipangayo nga badyet ni Mayor Rama. Si Kongresista Tomas, nga modagan og balik pagka mayor sa Mayo 20313 nga piliay, di gusto nga si Mayor Rama makapundo alang sa sunod nga eleksyon.

Gawas nga gikapnan kapin sa tunga ang badyet ni Mayor Rama, gibutangan pa gyud sa konseho og kontrol kon unsaon og gamit ang maong badyet ug ang konseho ang modesidir. Mora nag tawo-tawo diay ani si Mayor Rama.

Kon ako si Mayor Rama di jud ko mosugot nga himuon lang ko og tawo-tawo sa konseho. Ang konseho na hinuon ang magbuot kon unsay buhaton sa mayor. Kaniadto sa mayor pa si Tomas, ang konseho stampad ra sa mayor.

Seloso lang si Kongresista Tomas. Di siya gusto nga awaton ni Mayor Rama ang iyang pamaagi sa paggamit sa pundo sa dakbayan alang sa piliay sama sa iyang gibuhat dihang midagan siya pagka kongresista batok ni negosyante Atan Guardo.

Unsa kahay buhaton ni Mayor Rama human gikapnan sa mga alipores ni Kongresista Osmeña ang iyang gipangayo nga P11.8 bilyun nga badyet? Di maayo nga magpakahilum lang si Mayor Rama sa gibuhat sa konseho.

Apan bisag unsa pay buhaton ni Mayor Rama kutob ra siya sa panghayhay tungod kay ang konseho mga tawo man ni Kongresista Tomas. Hinuon, ang gibuhat sa mga konsehal nagmatuod lang nga mga bata-bata ra sila ni Tomas.

Si Kongresista Tomas dako og pagsalig sa iyang kaugalingon tungod sa iyang apelyido nga modaug gihapon siya pagka mayor sa dakbayan sa Sugbo. Mao ni usa ka rason nga ang iyang ginsakpan sa BO-PK di gyud mobiya.

Apan dunay gipatuyok nga estorya sa dakbayan nga kon mag-eleksyon karon adlawa pildihon si Tomas ni Mayor Mike pagka mayor. Ang tsismis wa hinuon magklaro unsay basi nga pildihon si Tomas ni Mayor Rama sa pagka mayor.

****

SUMBALIK. Tungod kay gipatug sa Ombudsman ang mga kaso batok ni Gob. Gwen Garcia, si Deputy Ombudsman for Visayas Pelagio Apostol gimanduan sa opisina sa Presidente sa pagtubag sa kasong gipasaka batok kaniya.

Imbis nga si Apostol maoy momando sa akusado og pangurakot sa pag-tubag sa sumbong, karon si Apostol na usab ang magkapuliki og tubag sa kiha batok kaniya. Si negosyante Crisologo Saavedra ang nagpasaka sa sumbong.

Ang sumbong batok ni Apostol didto sa opisina sa Presidente mao ang dugay nga pagresolba sa mga kaso batok ni Gob. Gwen Garcia sama sa overpriced nga Cebu Internation Convention Center (CICC).

Ang laing kaso mao ang pagka wala sa sakyanan sa gobyerno nga gigamit ni Apostol. Gani gusto ni Saavedra nga masuspenso si Apostol samtang nagpadayon ang kaso batok kang Apostol.

Bisag unsay ipamung ni Apostol agig depensa sa iyang pagkatawo, ang mga tawo duna nay pagduda tungod sa kahinay sa disposal sa mga kaso batok ni Gobernador Garcia. Sus kon masuspenso si Apostol, kinsa kaha ang ipuli kaniya? (elespinoza53@yahoo.com)