Mongaya: VSMMC gipadak-an

Monday, December 12, 2011

DUNA nay dugang 10 ka mga private room ug pito ka mga operating room ang Vicente Sotto Memorial Medical Center (VSMMC) human kini gi-inagurahan sa miaging Huwebes nilang Gov. Gwen Garcia, Kong. Benhur Salimbangon, ug ang hepe sa hospital nga si Dr. Gerardo Aquino Jr.

Ang maong mga kwarto dunay mga kahimanan nga makakompetensya sa mga pribadong hospital, nagkanayon si Nonoy Mongaya nga maoy niateman sa mga sakop sa media nga ni-cover sa maong inagurasyon.

Have something to report? Tell us in text, photos or videos.

Makahinumdom gyud ko kaniadtong ulitawo pa ko dihang na-admit sa VSMMC og duha ka semana. Suwerte lang gyud kay usa sa mga empleyado ang akong inahan mao nga nakakuha og usa ka semi-private room.

Unsaon nga bisan niadtong tungora, daghan gyud ang mag-ilog nga maka-avail sa serbisyo sa maong hospital kay barato kaayo kon itandi sa mga pribadong tambalanan.

Bisan pa man sa mga dugang mga building nga gitukod sulod sa katuigan, kulang gyud gihapon kini kon itandi sa mga pasyente nga gikan sa lalawigan.

Gikinahanglan gyud ang padayong pagpalambo sa hospital kay kini alang gyud sa mga kabos ug bisan sa mga arang-arangan og kahimtang apan di makaapas sa mahal na kaayo nga mga pribadong hospital.

Imbes maayo lagi ka sa mga pribadong hospital, kuyaw nga atakihon hinuon sa kasing-kasing inig kakita sa bayranan.

Mao nga makaingon ko nga congratulations alang sa mga opisyal sa VSMMC labi na sa hepe nga si Dr. Aquino.

COMPUTER

Daghan ang naglagot niining gitawag nga Aguinaldo doctrine kay tungod niini, giingong di na magukod ang mga elective officials tungod sa mga kahiwian inig kahuman sa termino.

Hinuon, makaingon ko nga basin nausab na kini kay hangtod karon nga nahimo nang kongresista si kanhi mayor Boy Radaza, padayon mang buhi ang kasong pagpalit og giingong mahal ra nga mga computer batok kaniya.

Naglibog lang ko kay samtang padayong gigukod si Radaza tungod sa mga computer station (di man lang computer ang gipalit) nga mobili og P49,000, wa man gukda ang mga responsable sa lain sab nga kasong pagpalit og computer nga mobili og P100,000.00.

Kon tangtangon nato kining Aguinaldo doctrine, i-apply unta sa tanang mga opisyal ug way pabor-pabor.

HUMAN RIGHTS

Naghatag og dakong mantsa sa kredibilidad ni Presidente Noynoy Aquino kining pagdagmal sa mga nagrali diha sa Mendiola sa miaging semana dihang nag-angat ang kasaulogan sa Human Rights Day sa miaging Disyembre 10, 2011.

Ang atong presidente anak og duha ka mga bayani sa demokrasya sa Pilipinas. Di siya angay motugot nga mopakgang og mga demokratikong paglihok.