Mongaya: Diktadurya diay?

Saturday, December 17, 2011

WA moangkon si Court Administrator Midas Marquez, ang tigpamaba ni Chief Justice Renato Corona, nga ang iyang opisina maoy nagmando nga mag-court holiday sa miaging semana aron kintahay mo­­­suporta sa ilang gi-impeach nga amo.

Ang nakaapan lang kay di man sab malilong nga gikan sa iyang opisina ang mga text message nga nag­mando sa mga emple­yado nga mag-itom ug moduyog sa protesta.

Have something to report? Tell us in text, photos or videos.

Unsaon na lang? Kon makamao mamakak si Mi­das niining puntoha, unsa pa kaha ang ubang bakak ang iyang gisulti sa ngalan ni Corona nga wa nato masakpi pa?

Apan dunay mas da­kong apan nga nakapabalaka kanako dihang akong gibalikbalik sa pagbasa ang diskurso sa chief justice. Makita man gyud nato sa YouTube ug gipangpatik sab online ang tibuok text sa diskurso ni Chief Justice Renato Corona.

Naglibog ko sa mga punto ni Corona.

Matud pa niya, diktador si Presidente Aquino kay gipaninguha nga ma­tangtang siya pinaagi sa impeachment ug mailis ang usa ka chief justice nga ang presidente maoy magtudlo.

Naglibog ko kay ang impeachment usa ka paagi nga demokratiko. Naa kini sa Konstitusyon nga gitudlo sa Pol Sci 12. Inig human sa impeachment, moatubang pa si Corona og usa ka husay diha sa Senado nga makita sa tanan.

Apan ang atong Chief Justice moingon nga ang proseso sa pagtangtang og usa ka mahistrado nga mao ang impeachment ma­­kapahimong diktador ni Presidente Aquino.
Bag-o kini nga interpretasyon sa atong Konstitusyon? Di ko abogado apan nagkuha sab intawon kita og Pol Sci 12 oi.

Kon mailisan si Corona, natural si Presidente Aquino ang motudlo sa moilis kaniya.

Apan moingon na si Chief Justice Corona nga kining moilis kaniya tawo na ni Aquino ug ang presidente makadiktar na sa Korte Suprema.

Kon magpadiktar si Chief Justice Corona sa nagtudlo kaniya nga si kanhi presidente Arroyo, mao sab kini ang iyang gilantaw nga mahitabo kon si Noynoy ang motudlo?

Klarohon lang nato nga si Corona usa ka midnight appointee ni Arroyo. Gipugos gyud intawon. Karon, kon mahusay nga sad-an si Corona, di man midnight appointee ang matudlo puli kaniya. Kadako sa kalainan.

Kon buot hunahunaon, mas arang-arang pa kadtong Chief Justice panahon sa diktadurya nga maoy mopayong kang Imelda Marcos kay naa man sa poder kini. Kini si Corona nagpakita gyud og utang kabubut-on kang Gloria Arroyo.

Bisan og wa na sa Malakanyang si Arroyo, adto kaniya man gihapon si Corona moyukbo.

Mao nga natanom hinuon sa akong hunahuna nga di lang utang kabubut-on ang gibati ni Corona. Nakuryoso na hinuon ko sa iyang statement of assets and liabilities nga iyang gitago kay basin naa diha masakpan nga duna gyud diay dugang pa sa utang kabubut-on ang ilang re­lasyon.

Sakto si Judge Menmen Paredes sa Branch 13 kay isip chief justice, si Corona nitutok unta sa pagbatbat sa mga puntong legal atol niadtong iyang court holiday nga kintahay gipanawagan ni Midas.

Apan naghisgot na man hinuon og mga politikal nga punto si Corona. Politiko sab diay ka, Chief Justice Corona?

Maayo na lang kay duna sab gyud diay nga huwes nga di sipsip kang Corona ug tinuod nga independente. Taga Sugbo pa gyud.

(www.inbetweencolumns.wordpress.com)