Espinoza: Binuang sa tighatod sa notisya

Monday, December 19, 2011

KAPNAN. Ang gipro­po­ner ni Mayor Mike Ra­ma nga P24 milyunes nga intelligence fund gikapnan sa konseho og nahimong P500,000 na lang. Way lain nga kadudahan nga nagmando kon di ang ilang amo nga si Kong. Tomas Osmeña.

Dako og pgatuo si Kon­gresista Tomas ug dili niya madawat nga gamiton unya ni Mayor Rama ang maong pundo alang sa iyang pamulitika labina kay sila ra ba unya ang mag-atbang pagka-mayor sa 2013 nga piliay.

Have something to report? Tell us in text, photos or videos.

Sa pipila ka tuig nga mayor sa dakbayan sa Sug­­­-bo si Tomas nakahibawo na siya unsay gamit sa in­­telligence fund. Ang pag-kapon sa griproponer nga intelligence fund ni Mayor Rama klaro kaayo nga di gusto si Tomas nga makahupot og dakong pundo si Rama.

Bisan pa sa gipamahayag ni Supt. Melvin Ramon Buenafe, ang he­pe sa kapulisan sa dakbayan, nga maapektohan ang trabaho sa pulisya tungod sa kagamay sa intelligence fund sa akong tan-aw di na mausab ang desisyon sa konseho.

Gikwestiyon usab ni Mayor Rama ang pagkapon sa iyang intelligence fund. Matud pa niya wa gi-ayo og estudyo sa konseho. Ang maong kantidad girekomendar sa Police Coordinating and Advisory Council pinaagi sa pamaagi nga gihatag sa DILG.

Kon mahimo pa lang isulti ni Tomas sa publiko sa iyang gibati sa reklamo ni Mayor Rama ug sa gipamung ni Buenafe kabahin sa P500,000 nga intelligence fund daw mo­ingon lang tingale si Tomas nga “estoryahe”.

Sa pranka nga estorrya, samtang nga si Tomas pa ang amo sa BO-PK klaro kaayo nga si Mayor Rama mamunit lang intawon og momho sa pundo sa dakbayan kay di gyud mahitabo nga mahatagan siya og dakong pundo sa konseho nga iyang magamit unya sa pamulitika.

Si Tomas ug iyang kon-­seho nakabantay dihang nanghambog si Mayor Ra­ma atol sa kumbensyon sa mga barangay konsehales diin iyang giimbitar ang mga konsehal nga modagan pagka konsehal sa dakbayan ug siya ang bahala sa gasto. Karon gisirhan na hinuon ang imong oportunidad nga makapundo si mayor.

****

BINUANG. Ang ne­gos­yo karong panahona lisod. Ang mga telekomunikasyon nga negosyo sama sa telepono putlan dayon ang tagbalay kon dili makabayad. Apan dunay mga sitwasyon nga angay nilang bantayan sama sa binuang sa mga tighatud og bill o notisya.

Ang among telepono sa balay giputol sa PLDT (Philippine Long Distance Telephone Co.) niadtong Huwebes. Nahibong na lang ko nga di na ko kagamit sa akong PLDT Plus.

Pagtawag na ko sa ilang customer service gisultihan ko nga wa mi kabayad.

Nahimo namong la­lis sa taga call center nga maoy nagservice sa PLDT tungod kay wa mi makadawat sa bill gikan sa PLDT. Bisan pa niini, akong gibayran niadtong Biyernes apan wa gibalik among telepono hangtud niadtong Lunes dihang nagkaestorya mi ni Nilo Bantilan usa sa mga manager sa PLDT pinaagi ni Super Bobby.

Matud pa ni Mr. Bantilan nga dunay pirma nga nadawat ang among bill sa buwan sa Oktubre. Ang wa mahibaw-i sa tighatud sa bill nga duha ka iro ra ang naa sa balay sa tingtrabaho. Sa ato pa gimao-mao og pirma sa tighatod sa bill.

Bisag di mi datu apan matag abot sa among mga bayranan amo dayon bayran kay ang akong asawa, Dr. Malou, di gusto nga naay nag-um-um nga bayranan. Akong gipasabot ni Mr. Bantilan nga wa mi gyud kadawat og bill gikan sa buwan sa Oktubre.

Maayo gani kay si Mr. Bantilan aksyon dayon ug iyang gipabalik ang among telepono.

Akong gisaaran si Mr. Bantilan nga kon dili among pirma ang naa sa notisya akong ikiha ang tighatod sa notisya.

(elespinoza53@yahoo.com)