Mongaya: Lupig si Ondoy

Monday, December 19, 2011

WA magdahom ang mga lumolupyo sa mga syudad sa Cagayan de Oro ug Iligan didto sa Northern Mindanao nga mokalit sa pagbaha tu­ngod sa Bagyong Sendong. Mao nga wa sila mangandam pag-ayo.

Kasagaran man gud, ang mga bagyo nga moigo sa Surigao mobalising dayon diri sa Visayas labi na sa Leyte, Bohol ug Sugbo. Karon pa ko gani nakadungog nga molabang ang bagyo padung sa CDO ug Iligan.

Have something to report? Tell us in text, photos or videos.

Didto sa Luzon, labi na sa Metro Manila, allergic na kaayo ang mga lumolupyo labi na sa daplin sa mga sapa. Mamakwit na dayon kon dunay balita nga moagi ang bagyo.

Mao nga ubay-ubay ang nangatulog dihang kalit nga nisaka ang tubig gikan sa kabukiran ug ning-awas ang kasapaan. Lalim bay, giingon nga ang average rainfall matag bulan gibubo sa Sendong sulod lang sa 12 ka oras.

Karong pagkasulata, ambot kon niabot na ba og libo ang mga nangamatay, simbako. Lupig si Ondoy.

Moawhag na lang kita og mga pangadye alang sa mga nangamatay ug mga hinabang alang sa mga survivor.

Nalipay ko nga naka-monitor sa kaabtik sa mga Cebu bloggers ug sa mga sakop sa Stand Foundation nga dali kaayong naka-responde sa mga panawagang magpadala og mga hinabang.

Makapanamin sab kita sa kaandam sa Sugbo simbako moigo ang grabing baha. Nakahibawo na man kita nga gamay lang nga ulan, dali kaayo mosaka ang tubig sa kadalanan. Di gyud makaya sa atong karaang drainage system.

Apan kining atong mga opisyal sa syudad, mas giuna pa intawon ang pamulitika. Siging ba­bagay sa mga budget ug proyekto.

Kon ingon niini ang mahitabo, makapaabot ki­ta sa posibilidad nga ang klarong mga lakang alang sa pagpalambo sa atong drainage system mahitabo pa inig human sa piliay sa 2013.

LUWAT NA CORONA

Didto sa kaulohan, nasiguro ko nga nakita na ni Chief Justice Renato Corona nga wa kaniya ang mga 2/3 sa mga senator-judges nga maoy mohusay sa mga reklamo batok kaniya.

Nakaingon kita niini kay tinuod man nga usa ka political body ang Senado (mamulitika man gani ang Korte Suprema) ug nasiguro ko nga ang mga desisyon sa matag usa ka senador mosubay sa ilang pag-aninaw sa dagan sa politika ug unsay epekto sa ilang mga desisyon.

Tulo ra man guy loyalista ni kanhi presidengte Gloria Macapagal-Arroyo diha sa Senado dili sama sa Korte Suprema nga nakaabot sila mayorya.

Nakahibawo pud kini si Corona nga mas ulaw kon mahusgahan siya nga sad-an busa, alang kanako, mas maayo nga mosunod siya kang Merciditas Gutierrez nga niluwat sa pagka Ombudsman kay sa magpahusay sa Senado.

Di lang sab siya mo­padayon niining pagmugna og constitutional crisis tali sa executive ug judicial departments sa atong kagamhanan. Epektibo kini kon tarong ang kawsa nga iyang gipakigbisogan ug di tungod sa usa ka kanhi presidente nga daghan og giingong sala sa katawhang Pilipino.

MAG-OPOSISYON?

Sulod sa pipila ka higayon, nakatabang sa pamilyang Garcia ang ilang pag-apil sa koalisyon nga gimugna ni Speaker Sonny Belmonte aron mahiusa ang usa ka mayorya pabor sa administrasyon ni Presidente Aquino.

Apan sa miaging semana, wa mamirma ang duha ka mga kongresistang Garcia – ang mag-amahang si Pablo ug Pablo John – sa impeachment petition batok kang Chief Justice Corona.

Tungod sa pagtaktak kang Kong. Mandanas nga usa ka sakop sa Liberal Party, makaingon ko nga ingon niini sab ang mahitabo sa ubang dili LP nga wa mamirma.

Mao nga nakapangutana ko kon mag-oposisyon na ba ang mga Garcia. Ug naintriga ko sa kalamboan nga si Kong. Red Durano tua suporta sa impeachment. Buot ipasabot, signal kini nga naa na gyud sa koalisyon sa administrasyon ang mga Durano.

Nagpasabot ba sab kini nga nagbuwag na ang kampo sa mga Durano ug sa mga Garcia?

(www.inbetweencolumns.wordpress.com)