Obenieta: Dapit sa kahimayaan

Friday, December 23, 2011

KAAYONG kulatahon sa mananaygon, labi na kon sa imong paminaw mao ra’g namikat ug nag­hinanggaw ang iyang pa­ugat: Kasadya ning taknaa…

Dapit sa kahimayaan. Ki­ni hastang layoa ra sa tinuod, kon pasultihon ang mga nakasinati sa mga ka­talagman nga sagad ga­-kuso-kuso sa nasod. Bitaw, di tuod lalim ang nahitabo didto sa mga dakbayan sa Cagayan de Oro, Iligan, ug pipila ka dapit sa Negros nga gaantos sa kabangis sa ulahing unos ug lunop. Ang ilang gidangatan tataw nga gapasamot ug gadugang lang gyod sa ilang tyabaw, mulo, ug panghupaw kabahin sa naandan nga kalisdanan.

Have something to report? Tell us in text, photos or videos.

Pastilan, lupig pa’y gitingsian sila sa pangag ug bungi kon timbayaon sila og “Maayong Pasko!” Ay, lagmit palabihon pa tingali nila nga sagpaon ug yaga-yagaan sila imbis sing-alan sa ilang atubangan: “Mao ra’y atong makita ang panagway nga masanagon…”

Apan samtang kita palaran ug mapasalamaton nga nakalikay sa urom gikan sa pintas nga panahon, unta mahigmata pod ta sa atong tulobagon bugti sa nahiagoman sa atong kaigsoonan nga nalumos sa kaalaot ug sa ilang kabanayan nga buhi apan nalubong sa kasubo. Ug dayag nga kining maong tulobagon masaksihan pod baya nato sa pagsanong sa tahas nga tabangan ang mga gabangotan. Nasaksihan nato ang pagbaha sa mga hinabang nga gapamatuod nga padayong buhi ang mithi sa pagkamahinatagon.

Gasa nga gasabyag og kahayag batok sa kangitngit sa kaguol ug kabalaka. Kini mahimong atong ipaambit pinaagi sa pag-amping ug pagbulahan sa kinabuhi. Kini mahimong buhaton pinaagi sa paghiamgo nga likayan kun pakgangon ang laing pagwaldas sa kamatayon tungod sa pagpabaya.

Pakusgan pa unta ang panginlabot alang sa kahimtang sa uban dungan sa pagtagad sa atong palibot. Duyog sa padayon nga bul-og sa mga relief goods ug financial assistance gikan sa mga Sugboanon alang sa mga nagkinahanglan didto sa Mindanao, mokisaw pod unta sa atong kahimatngon ang pahinumdom ni Mayor Michael Rama sa Local Disaster Risk Reduction Management Council (LDRRMC) ingon man sa Quick Response Team (QRT): Mahinungdanon nga magbantay taliwala sa pagsaulog sa Pasko.

Kinahanglan pod nga dili magpasagad ug magpabiling igmat ang mga Sugboanon ug Cebuanos bisan sa kasadya ngadto sa Bag-ong Tuig, labi na kay di matag-an ang panahon. Gani, gapasidaan na ang Mines and Geosciences Bureau in Central Visayas (MGB) 7 sa mga lumolupyo kilid sa mga sapa sa mahimong mahitabo—pag-awas sa tubig ug pagdahili sa yuta gumikan sa labing bug-at nga bundak sa ulan. (geemyko@gmail.com)

Kon dili maghaguka ang kagamhanan ug mapukaw ang katilingban sa mahimong dangatan kon dili magpakabana, lagmit dili na salikwaot paminawon bisan ang labing yabag nga mananaygon sa sunod Pasko puhon. (geemyko@gmail.com)