Espinoza: Nagpagoryo-goryo si Mayor

Monday, December 26, 2011

SUNOG. Di katuhoan nga masunog ang Gaisano Capital sa udtong tutok ning panahon sa Pasko. Ang akong mga higala ug ako nga nagtan-aw sa itom nga aso gikan sa Gaisano Capital natinutukay na lang mi ug nangutana sa hinungdan sa sunog.

Si Eric Labrada, ang tigpa­maba sa Gaisano Ca­­pital, nanghimakak sa akusasyon nga ang sunog sa pito ka ang-ang nga tindahan dili aksidente. Matod pa ni Labrada nganong
sunogon man nga moabli pa gani sila og duha ka sanga unya.

Have something to report? Tell us in text, photos or videos.

Ang makahibung man gud kay pag-abot sa mga bombero wa man dayon sila pasudla sa tindahan sa mga tawo nga wa nila mailhi. Matod pa ni Cebu City Fire Marshall Anderson Comar nga sa dihang gipasulod na sila di na sila makakita tungod sa grabeng aso.

Ang alaot sa maong sunog di lang ang Gaisano Capital nga gidumala ni Edmund S. Gaisano apan ang empleyado ug mga gagmay nga retail outlets usab nga posible nga way insurance ug wa makapangandam.

Ang katapusan nakong sulod sa Gaisano Capital, Gaisano South pa kaniadto, morag duha na ka Pasko ang miagi. Pagka swerte nako ug sa akong pamilya nga wa mahitabo ang sunog niadtong higayona.

Di angayan ikasuko sa tag-iya kon dunay magduda sa hinungdan sa sunog. Kusog ra sad kaayo nga mikuyanap ang kayo sa ibabaw nga bahin sa tindahan kon ang mibuto ang generator nga naa sa kinailawoman sa edipisyo.

Ang mga pagduda matubag ra unya sa resulta sa imbestigasyon nga ipahigayon sa taga bombero. Di sa ta mohusgar karon sa nahitabo hangtod di mogawas ang resulta sa imbestigasyon sa taga bombero.

****

NAGPAGORYO-GORYO. Sulondon ang gibuhat ni Ma­bolo Barangay Captain Rey Ompoc ug ang iyang mga kauban nga opisyales. Matud pa ni Kap Ompoc nga miatender sila sa Christmas party ni Mayor Mike Rama niadtong Disyembre 22 agig respeto sa mayor.

Apan gipanghamakak ni Kap Ompoc nga nakadawat siya og cash gift gikan ni Mayor Rama.

Matud pa niya sayo siyang mipauli. Hadlok nga mabol-awot ni Kong. Tomas Osmeña.

Gisangyaw ni Kap Ompoc nga ang iyang leyaltad naa gihapon sa BO-PK.

Nagpakita usab og gilas si Bise Mayor Joy Young kay iyaha kunong gitugtan ang mga barangay opisyal nga sakop sa BO-PK sa pagtambong sa Christmas party ni Mayor Rama.

Gitugtan man gani pero dakong posibilidad nga gisugo sila og pangispiya.

Ngan nga ehekutibo sa dakbayan sa Sugbo, angayan lang morespetar ang mga opisyal sa barangay bisag mibiya na si Mayor Rama sa BO-PK tungod kay basi sa balaod ang mga barangay opisyal independente o way partido nga gikuyogan.

Giingon nga 60 ka kapitanes nakadawat og P5,000 ug ang mga konsehales nga nakadawat og P3,000 gikan sa kau­ga­lingong bulsa ni Mayor Rama. Dunay usa ka opisyal nga tsismoso ug gibulgar ang ilang gibuhat sa giingon nga Christmas party.

Matod pa nagpili silang opisyales sa barangay og kinsay modagan pagka konsehal sa partido ni Mayor Rama sa 2013 nga piliay. Giingon nga duka ka kapitan ug konsehal sa norte ug sur ang gituboy nga modagan pagka konsehal kuyog ni Mayor Rama.

Apan si Mayor Mike makamao sad og pagoryo-goryo. Wa siya mobalibad ug wa sad moangkon nga nanghatag siya og kwarta sa mga kapitanes ug konsehales ug sa giingon nga straw balloting.

Sa akong tan-aw sa di pa matapos ning buwan sa Dis­yembre, magpatawag si Kongresista Tomas og miting sa mga opisyales sa tanang barangay dinhis Sugbo gawas sa Lahug tungod kay di man sila magkaduol ni kaniadto kapitan Mary Ann delos Santos nga karon konsehal.

Merry jud ang Pasko ron sa mga opisyales sa barangay.

(elespinoza@yahoo.com)