Mongaya: Logging ug Sendong

Monday, December 26, 2011

MGA dagkong troso nga sama og bag-o lang gipangputol ang ningdumbol sa gatosan ka mga balay didto sa Cagayan de Oro ug Iligan kay nangaanod sab gikan sa kabukiran sa Bukidnon padulong sa dagat.

Di man kini malilong kay makita mang nanglutaw sa baybayon sa duha ka mga syudad ang liboan ka mga troso uban sa mga kahoy nga gikan sa mga nangagubang kabalayan.

Have something to report? Tell us in text, photos or videos.

Human sa pag-ateman sa mga nangabiktima sa maong trahedya diin mokapin pa sa 1,000 ang nangamatay, angayan dayong gukdon kining padayong nag-alot sa atong kalasangan bisan pa man sa klarong pagdili sa logging.

Kon duna man ganiy opisyal sa Department of Environment and Natural Resources (DENR) nga nagpatuyang lang sa paghatag og permiso ug pagdupa niining mga logger, angayan sab kining prisuhon sama sa nahitabo kang kanhi presidente Arroyo ug Comelec chairman Abalos.

BASURA?

Kaubos diay sa pagtan-aw ni Mayor Vicente Emano sa mga nangamatay nga mga lumolupyo.

Lalim bay iya lang kining gipainitan diha sa dumping site sa Cagayan de Oro City? Adto kuno niya gipabutang aron matan-aw sa mga paryente ang mga lawas ug maangkon dayon.

Kon iya pa kadtong mga paryente ug sakop sa pamilya, motugot kaha si Mayor Emano sa maong kahimtang? Apan kay laing tawo man, anha lang mo kuyog sa basura.

Syaro na man sab kon walay dakong hawan sama sa mga sports center ang Cagayan de Oro diin adto mabutang ang mga lawas sa di pa kini ilubong.

Kon buot ra bang hunahunaon, si Mayor Emano ang nagtugot nga padayong makapuyo daplin sa Cagayan River ug kining usa ka gamayng isla tunga-tunga sa maong sapa bisan pa sa kakuyaw sa maong kahimtang.

Ang gihunahuna lang gyud ni Mayor Emano mao kining umaabot nga mga piliay diin kining mga lumolupyo mga botante. Wa gyud makahunahuna ang mayor nga mahimo man untang magproyekto og housing aron mahimong relocation site sa mga kabus. Mas garbo pa kini nga ipanghambog sa panahon sa piliay.

MGA MEDIA

Duha ang namatay ug moabot og 18 ka mga sakop sa media didto sa Syudad sa Cagayan de Oro ug Iligan ang apektado sa grabing baha tungod sa Bagyong Sendong.

Lakip ang mga mo-cover sa mga panghitabo nahimo sab nga biktima niining trahedya diin kapin na sa 1,000 ang nangamatay ug liboan ang nawagtangan o nangaguba ang mga balay.

Atong nasayran nga napalgang patay sila si Michel Kundiman sa dxRJ ug Leonisid Alsonado sa dxIC-RMN sa Iligan. Gawas sa mga sakop sa media, pipila sa mga blogger sa CDO ug Iligan ang apektado usab.

Samtang dunay nabiktima sa ilang han-ay, di ikalimod nga tungod sa media ug sa online community, dali kaayo nga nabaniog ang nahitabo ug nahatagan dayon sa atensyon sa nasud ang panginahanglan sa mga biktima.

Nagkanayon ang akong misis nga di lalim nga magtrabaho sa mga mantalaan, radyo ug telebisyon samtang ang imong balay napuno sa lapok, way kuryente, ug way tubig. Di lalim kining magpadayon sa pagserbisyo samtang wa ka masiguro sa pagkabutang sa pamilya.

Niingon siya nga dakong panginahanglan gyud mao ang tubig sa pagkakaron kay wa may tinubdan.

Mao nga saludo gyud ko sa akong mga kauban sa buhat didto sa CDO ug Iligan.

(www.inbetweencolumns.wordpress.com)