Mongaya: Juan Time Na!

Saturday, December 31, 2011

DAKO ang atong panghinaot nga malampuson ang pagpalihi nato karon sa gitawag nga Juan Time. Mao kini ang pagtakdo sa atong tanang mga relo sa Philippine Standard Time kun PST aron dina mahitabo ang maglain-laing oras sa kada relo nga atong makita.

Aron di kita masipyat, labing maayo nga atong itakdo ang atong mga relo sa insaktong oras sa www.weather.gov.ph kay ang Pagasa mao man ang atong official timekeeper. Ang maong ahensya naggamit karon sa usa ka rubidium atomic clock ug global positioning system.

Have something to report? Tell us in text, photos or videos.

Gitawag kini og Juan Time sa tinguha nga ma­sulbad kining giingong Pilipino Time nga magsigi na lang og late. Kasagaran sa rason kay late ang relo.

Hinuon, di man sab relo ang nauwahi. Duna say kinaiya nga kon di moabot ang oras, mao pa say ilihok. Haha. Morag naigo ang nagsulat da.

Apan lahi man karon kay Bag-ong Tuig baya. Adlaw sa tingpalihi. Kon masugdan, nganong di na man lang padayunon hangtod nga makinaiya na gyud sa tibuok katawhang Pilipino?

Malipayong Bag-ong Tuig diay sa tanang magbabasa niining atong labing kinaham nga mantalaang Sugbuanon.

WATER DRAGON

Daghan ang moingon nga ang 2012 maoy tuig sa Black Water Dragon. Ug tuod man, daghan na ang mga nagka-interes karon kon unsay atong mapaabot sa maong tuig.

Apan yuna pa, kining maong tinuohan iyaha sa mga Insek ug ang Chinese New Year karon pang Enero 23, 2012 magsugod.

Bisan pa man, ato na lang kining hisgutan kay Bag-ong Tuig na man sab karon alang kanatong di mga Insek.

Matod pa, ang Dragon usa ka legendary nga mananap ug simbolo sa emperor sa Tsina. Kay misteryoso man ang kolor sa Dragon, ang mga Insek nag-isip niini nga di matag-an, di mahikap, ug ang mga tawo di makakita sa ulo ug ikog niini sa samang higayon.

Tungod niini, posibleng dunay mga panghitabong kalit ug di matag-an sab dayon karong 2012. Sumala pa sa sine basis a mga tinuohang Mayan, ang end of the world kuno mahitabo karong tuiga kay mao kini ang tuig nga nitapos ang Mayan calendar.

Hinuon, lahi ang tinuohan sa mga Insek kay matod pa ang Year of the Water Dragon magdala man og dakong posibilidad sa swerte. Naglibog na hinuon ko kon si kinsa ang swerte unya tali nilang Presidente Aquino, Chief Justice Corona, ug kanhi president Gloria Macapagal-Arroyo.

Nagkanayon ang waterdragoninc.com nga ang Yang Water Dragon magsugod sa Enero 23, 2012 ug mahuman sa Pebrero 9, 2013 ug mahitabo kini matag 60 ka tuig.

Nagtuo sila nga dag­han pang umaabot nga mga Dragon years busa di kita angayang malisang kabahin sa pagtapos sa kalibotan. Apan mangandam lang gyud tingale kita sa baha aron di na mausab pa ang Sendong.