Mongaya: Daghang pabuto gihapon!

Monday, January 2, 2012

MILAMPOS ba ang kampanya batok sa mga pabuto sa miaging pagsugat sa Bag-ong Tuig?

Nasiguro gyud ko nga nilampos diha sa among balay kay unang higayon kini nga wa kami magpabuto.

Have something to report? Tell us in text, photos or videos.

Apan ang kasaba sa mga pabuto sa among mga silingan mas grabi pa karong higayona kon itandi sa miagi pang pagsugat sa bag-ong tuig. Daw nag-alirong sa among gipuy-an karon ang sipa nga mga bakos ni hudas dungan sa mga bag-o ug mahalong mga kwitis nga mora lang og mohadyong dayon mosiga ang tibuok langit.

Tungod niini, nagtuo gyud ko nga mas grabi ang pabuto karong higayona ug palpak ang kampanya batok sa mga pabuto. Di madala sa panghadlok nga maangol.

Ug ang panawagan nga imbes magpabuto, ipadala na lang ngadto sa mga biktima sa Bagyong Sendong didto sa northern Mindanao daw gidungog lang sa adlaw sa Pasko kay mingaw man niadtong tungora.

Pagkabuntag na, akong nasayran gikan sa usa ka higala nga taga-Poblasyon sa Syudad sa Talisay nga mas mingaw karon kay sa miaging tuig. Saba lang kuno sa among subdivision kay daghang mga seaman ang nanguli. Mao kiniy nagbangka sa daghang mga pabuto.

“Diay ba,” nakaingon ko sa akong kaugalingon.

Lain-lain gyud ang mga obserbasyon gikan sa pipila ka mga tinubdan basi sa mga kaila nga nitubag sa akong mga text message niadtong gabhiuna ug mga kaistorya sa wa pa ko magsulat niining lindog.

Sa dalan Sanciangko, sipa kuno kaayo apan di pareho og kadugayon sa miaging tuig.

Apan dapit sa Labangon, halos di na madunggan ang tingog sa akong gitawgan kay nalubong sa sipa kaayo nga mga pabuto bisan nilabay na ang alas 12. Mao sab ang feedback diha dapit sa Duljo-Fatima. Sa Laray, baga kaayo ang aso pag-alas 12 tungod sa kadaghan sa mga pabuto.

Manghinaot lang ko nga nikunhod ang kadaghanon karon sa mga nangaangol.

Unsaon kay lisod man gyud banggaon kining pagpabuto sa pagsugat sa Bag-ong Tuig kay mao man kini ang nabatasan na sa mga Pinoy. Sukad sa atong pagkabata, mao na man kini ang atong namat-an. Daw tipik na kini sa atong kultura.

Alang kanako, daw di kasa­ulogan sa Bag-ong Tuig kon way mga pabuto. Mao kini ang akong nabati dihang nagpaso-paso sa among tugkaran nga way nagbuto-buto sukwahi sa mga tugkaran sa among silingan.

Nagtuo ko nga ingon niini sab ang gibati sa uban. Gani, nagplano na man ko nga sunod tuig, maniguro na ko nga daghan ang akong supply.

Maayo ba nga did-an sa kagamhanan ang pagpabuto?

Tinuod, dunay punto kini. Daghan na gyud kaayo labi na ang mga bata nga nangaangol.

Apan, sa akong kasinatian man gud, depende ra gyud kini sa pagpaniguro nga layo ka na
inig buto.

Nganong magpatugatuga man gyud sa paggunit og pa­buto inig duslit niini? Ang uban pa ra ba nga magpabuto, mag-inom. Dayon pabilibay sa mga kaila.

Ang ako lang nga pipila na ka tuig kining kampanya batok sa mga pabuto ug lisud na kini wagtangon. Atong nasayran nga ang mga pabuto mao ang usa sa mga tourist attraction na kay dunay daghang mga turista nga ampay motan-aw sa mga pabuto nga tipik na sa kinaiya sa mga Pinoy.

Nganong di man mahimo nga mangitag paagi nga layo ra ka nga magduslit? Nganong di man mahimo nga imbes magkampanya batok sa mga pabuto, ato na lang tud-luan kining magplano gyud nga mokupay og mga whistle bomb ug mga kwitis?

Ang ako lang nga di gyud mawala kining mga pabuto labi na sa bag-ong tuig. Mag-amping na lang sa sunod.