Obenieta: Pagtulon-an sa gamay nga gamhanan

Friday, January 6, 2012

WALA'Y kabug-at nga dili sarang tugbangan og kagaan.

Tan-awa, pananglitan, ang hulagway sa mga nanambong sa misa nga nisugwak gawas sa Basilica Minore del Sto. Niño bag-ohay lang. Dayag nga makita nato nga bisan pa’g gasangkiig ang langit tungod sa dakong dag-om ibabaw sa mga deboto, gatuyhakaw pod ang pagbukhad sa ilang mga payong nga mao ra’g mga taming batok sa kadakdakon nga ulan. Ug masuta pod nga sama ra’g nakig-indig sa mga pako ang kapakapa sa gipangbitay nga mga banderitas batok sa gasusapinday nga kabugnaw sa hangin nga wala gyod makapiog sa kainit sa pagtuo ug pagsaulog sa gadasok nga mga deboto.

Have something to report? Tell us in text, photos or videos.

Mapasalamaton, malaomon. Ingon ini, wala’y pag­duha-duha, ang wala’y puas nga gahalad sa ilang kalipay, kasakit, ug kabalaka diha sa gamhanang palad sa Balaanong Bata.

Wala’y bisan unsang katalagman ug katimawa ang mopaunlod sa galutaw nilang pagdayeg ug pangaliya.

Labi na ka’y gatapun-og tuod ang pag-antos sa kinabag-an tungod sa kalisdanan ug kaguliyang, wala gyo’y laing kadangpan gawas sa pinahangad ug pi­naluhod nga pagsalig sa Kahitas-an. Tataw nga kon bug-at ang mga suliran nga gisagubang sa nasod, gaan pod ang mga tunob sulod-gawas sa simbahan.

Gani, nahibal-an nato nga wala gyod nagpabangbang sa kaduka ug katugnaw sa kaadlawon ang gibanabana nga 80,000 ka mga deboto nga mikuyog sa prosisyon nga gitawag og “Walk with Jesus.” Malinawon ug hinlo ang maong kalihokan. Dayag nga gaan silang gisuyop sa gahom nga nailhan pod nga “bato-balani sa gugma.”

Bitaw, saksi bisan ang mga libat ug buta nga wala mag-inusara ang nakigduyog sa pag-ambahan sa gamay nga gamhanan. Dayag nga ila gyod tuod gipanaminan ang gipadayag sa rector sa basilica nga si Fr. Rodolfo Bugna: “We have a saying, no man is an island. This is a lesson we have learned versus today’s highly individualistic culture. There are so many suicide cases, because people feel alone.” Wala kuno’y tawo nga usa ka isla.

Kini mao’y pagtulon-an nga atong nakat-onan batok sa katilingbanong taras sa pagiya-iya ug pag-inato karong panahona. Daghan kunong panghitabo sa paghikog kay ilang gibati nga sila gainusara.

Ay, kon atong palandongan ang kahimtang sa batang Senyor, di lalim ang iyang gisagubang. Lagmit gibati pod niya ang tumang kamingaw kay dili tiaw kanang tahas niya sa Dios nga Amahan nga luwason ang katawhan gikan sa gibug-aton sa mga kasaypanan.

Apan sayod ta nga ang gahom sa iyang kalinghod mao po’y sarang sa kahingkod sa iyang katungdanan. Bisan huyang tan-awon, dili katahapan iyang kaalig-on: Gapahiyom gihapon bisan sa iyang kagamay, dili sama ni Atlas nga dako’g lawas apan lupig pa’y kalibangon samtang gapas-an sa kalibotan.

(geemyko@gmail.com)