Mongaya: More fun in the Philippines

Saturday, January 7, 2012

SA Bisaya pa, “Mas lingaw sa Pilipinas.” Iningles ang akong gititulo niining maong lindog karon kay mao man kini ang bag-ong slogan sa Department of Tourism alang sa bag-ong kampanya alang sa turismo.

Nalingaw ko nga nagsigi sa pag-monitor niini labi na sa Twitter nag-trending dayon ang hashtag nga #itsmorefuninthephilippines tungod sa pagsakay sa liboan ka mga Pinoy. Gani, niapil pa ang daghang mga artista.

Have something to report? Tell us in text, photos or videos.

Sa akong obserbasyon, ingon niini ang reaksyon sa kasagarang mga Pinoy nga naa sa Twitter tungod pa kay tinuod man gyud nga mas lingaw dinhi sa Pilipinas. Ug sayon kaayo siyang sumpayan og mga rason nganong mas lingaw sa Pilipinas.

Matod pa ni Jim Paredes sa Apo Hiking Society, ““It’s more fun in the Philippines”, Pasko, night life, beaches, shopping, eating, fiesta, birthday, kasal, pati lamay actually. #1ForFun.

Naay nagsugod og Facebook page nga “It’s More Fun in the Philippines” ug ang mga post kasagaran mga pang-poster kunohay kabahin sa maong slogan ug makalingaw ang mga konsepto labi na kay mga Pinoy ang naghimo.

Pananglitan, naay karaang hulagway sa mga national hero nato nga sila si Jose Rizal, Juan Luna, Felix Resureccion Hidalgo, ug Trinidad Pardo de Tavera nga nalango na ug natulog tungod sa subrang inom. Ug matod pa sa poster, “It’s more fun in the Philippines where national heroes know how to party and get wasted.”

Tinuod, di lang diay mga bugoy sa eskina nga mag-inom o mga Koreana nga alsahon na lang sa kahubog sa diskohan ang grabing nalingaw sa ilang gibuhat. Apil sab diay ang atong mga bayani kaniadto pa. Haha!

Oy! Nag-post pa si Justin Vestil sa Sun.Star sa front page sa Superbalita nga ang headline: “Namatay sa sex.”

Alang kanako, mas lingaw gyud sa Pilipinas labi na ang Sugbu karong panahon sa Sinulog.

Ang nakanindot sa maong slogan kay gawas nga tinuod nga lingaw gyud sa atua, nabuhi ang kasiaw sa mga Pinoy labi na sa social media. Akong gilantaw nga dako kini og epekto sa pagkumbinser sa mga turista nga moanhi sa atua ug makaduso kanato nga himuon gyud nga lingaw ang ilang pagbisita.

Di gyud hinuon malimod nga daghan pang mga kulang sa Pilipinas labi na sa inprastruktura, sa peace and order, ug batasan mismo sa pipila sama niining mga abusadong mga drayber sa taxi.

Apan nakinaiya sab sa mas daghan nga kon nakahibawo kitang dunay moabot nga mga bisita, maninguha sab kitang malimpyo ang atong balay ug makaandam sa labing maayong pagkaon, ug mopalit og igong ilimnon aron malingaw kita kuyog kanila.

Nakaingon ko nga mas epektibo kining maong slogan sa pag-involve the Pinoy labi na diha sa social media nga maoy kasagarang tamdan karon sa mga turista kon modesisyon kon asa ang ilang sunod destinasyon. Di na man kita makontento nianang mga mahalong mga advertisement sa telebisyon. Ug ang nakanindot, pinaagi sa maong slogan lang, daghan na kaayo ang mga post karon sa Internet nga magdani og mga turista.

Hinuon, panahon pa man karon sa pagluto ug anha na kita makaingon nga maayo gyud kini sa panahon sa pagkakaon na. Kon tinuod mangabot ang mas daghang turista, makaingon gyud kita nga epektibo gyud diay.