Barrita: Mga bus driver suweldohan na?

GIPAHIBAWO ni manlalaban Manuel Iway, sakop sa Land Transportation Franchi­sing and Regulatory Board (LTFRB), nga suweldohan na ang mga driver sa bus sa tibuok Pilipinas sugod karong Enero 16.

Kinahanglan nga ang suweldo sa mga driver mas taas pa sa minimum daily wage ug ang ilang trabaho di molapas sa walo ka oras matag adlaw.

Kadaghanan sa mga driver nagdawat og porsiyento sa ilang inadlaw nga kinitaan. Ang pa­ngutana mao kini: Gi­konsulta ba ang mga driver nga apektado niini?

***

Sumala sa taho, ang bag-ong giluwatan nga kamandoan sa LTFRB makapahimong luwas sa mga biyahe sa bus kay di na morisgo ang mga driver sa pagpasirit og padagan ug pagsuyop og
drugas aron di magduka ug mas daghan ang ilang biyahe.

Kay kon dakog kita, dakog porsiyento.

Tingali ang gibasihan sa LTFRB mao ang mga panday nga inadlaw ang suweldo. Hinay kaayong modukdok sa lansang ug magduka samtang maggabas og kahoy.

Ang driver nga kusog mopadagan, kusog gyud mopadagan.

***

Apan hayan nga momenos ang kinitaan sa mga bus driver kon magdawat na lang sila og suweldo, matod pa ni Richard Corominas, presidente Cebu Provincial Bus Operators Association (CPBOA).

Ang minimum wage sa Metro Cebu P305 matag adlaw.

Matod pa ni Corominas, kadaghanan sa mga operators dinhi sa Sugbo naghatag og 10 porsiyento. Panang­lit mokita ang bus sa usa ka adlaw og P7,000, kuhaan kini sa fuel cost nga P3,000 ug ang driver makadawat of P400, ang 10 porsiyento sa limpyo nga P4,000.

Mas dako pa ang porsiyento kay sa P305 nga mi­nimum wage.

***

Lakip hinuon sa compensation package, matod pa ni Iway, mao nga ang bus driver hatagan og security of tenure. Sa ato pa, di na sila masayon-sayon sa pagpapahawa sa trabaho, gawas lang kon dunay nahimong kasaypanan.

Ibutang usab ang mga bus driver sa coverage sa Social Security System, Pag-ibig Fund, and Philippine Health Corp.

Mga pamaagi nga aduna pa silay mapaabot ug madawat sa higayon nga moabot na sila sa tukmang pangidaron, sa panahon nga masakit ug kon gusto silang makaangkon og kaugalingong panimalay.

***

Ang tan-awonon na lang niini mao ang pagkwenta sa gitagal nga walo ka oras nga trabaho sa matag adlaw.

Sumala pa ni Julito Flores, presidente sa Cebu South Mini-Bus Operators Association (CSMBOA), kinahanglan nga konsiderahan sa LTFRB ang panahon nga mausik sa usa ka driver samtang maghuwat og pasahero.