Obenieta: Gasa sa mga gawasnon

Friday, January 13, 2012

LUPIG pa’y libod-suroy, wala’y pahuway ang pangandoy. Pasagdan na lang kon kini mosutoy palayo, bahala na’g dili na mapalgan. Kaayo kahang ipanampiling, maghukdong sa suok samtang gatapun-og ang mga pagmahay nga gidam-ok sa katuigan. Ay, lupig pa’y gibartolina ang kahigayonan.

Apan bisan pa’g pit-os ang kahimtang, wala’y babag ang pagpangandoy. Labi na’g lapad gihapon ang wanang sa dughan, sama sa hawanan diin taman sa ginhawa ang pagkakiatan sa mga wala’y buot. Magtagubtob gihapon ang kaikag sa paglayat ug pagtuyhakaw sa pak-an nga pagbati kon gabaton ta’g kasingkasing sa usa ka bata.  Ug kini mao’y gipamatuod sa usa ka 82-anyos nga binilanggo sa Cebu City Jail.

Have something to report? Tell us in text, photos or videos.

Bisan sa talisalop nga panahon ni David Salonoy, lupig pa niya’y nanaghoy duyog sa mga tuktogaok sa kaadlawon. Bisan pa’g labaw pa sa langob ang kangiob sa iyang kahimtang luyo sa mga rehas, gawaldas gihapon ang kahayag sa iyang panglantaw.  

Bag-ong bidlisiw. Ug kini dayag nga mao’y nasiplatan ni Salonoy dihang gitagaan sa mga tigdumala sa Sinulog og kahigayon ang mga pinireso sa pagyukbo sa Balaang Bata. Atol ka kalihokan nga gitawag og “Duaw sa Señor Sto. Niño sa mga Preso sa Sugbo,” bisan ang galagiting nga adlaw wala makapakgang kang Salonoy sa pagtambong sa misa pasidungog sa Batang Balaan. Dili pod mapugngan ang iyang pangaliya tugbang sa gitas-on sa iyang pagsalig ug pag­laom.

Unta makauli balik sa umahan didto sa Barili, matod pa ni Salonoy. Ang iyang gipabuhagay ngapanangpit kang Senyor tataw nga tugob sa kauhaw sa pag-usab ug pagkagawasnon. Ug kini sarang pod natong panaminan kun pamalandongan.

Bitaw, dili malilong nga lupig pa pod nato’y mga binilanggo sa tagsa-tagsa natong kahuyang samtang gilup-og sa kalisdanan, kalapasan, ug kapakyasan.

Pastilan, samtang padayong gakamang ang kina­bag-an sa paningkamot—sa minaayo man ug mangtas nga pamaagi—aron dili magutman, wa’y lalis nga natanggong gihapon ang nasod sa hinanggaw ug hinakog nga pangatungdanan sa atong kagamhanan. Hastang surambawa kay kining salayawon nga kahimtang gisamotan pa gyod sa kapintas sa mga katalagman—binuhat sa kinaiyahan ug sa tawo.

Sa bisan unsang pag-antos nga gisagubang, ang mga deboto sa Senyor wala’y undang sa ilang pangandoy: “Kanamo maluoy ka unta…” Ug samtang kini ipalanog aron matandog ug mabira sila sa “bato-balani sa gugma” gikan sa Kahitas-an, ang paningkamot nga makab-ot ang katumanan sa pag-ampo usa na ka pagdawat sa gasa alang sa kaugalingon ingon man nasodnon nga pagkalingkawas ug pagluwas.

(geemyko@gmail.com)