Mongaya: Viva Pit Senyor!

Saturday, January 14, 2012

MINILYON ka mga Sugboanon ug mga bisita sa Sugbo ang gipaabot nga manggawas sugod sayo sa kabuntagon diha sa kadalanan karong adlawa aron magsaulog sa pista ni Senyor Santo Niño. Kini human sa prosesyon kagahapon sa hapon nga gitambongan sab sa maingon nato nga liboan sab.

Sukwahi sa miaging tuig dihang daw gisuwayan sa Senyor ang pagtuo sa mga deboto kay giuwanan pagmaayo ang prosesyon, gani gipabahaan pa.

Have something to report? Tell us in text, photos or videos.

Kagahapon, human sa halos tibuok semana nga nagsigi sa pag-ulan, nikalit paghayag ug ningisi ang adlaw. Ang nakanindot kay daw landong ug di hait ang kainiton sa adlaw. Daghan gyud unta ang nag-andam og payong kay nag-tuong mag-ulan.

Magpasalamat kita sa Senyor. Manghinaot ko nga ingon niini gihapon ang panahon karong adlawa. Viva Pit Senyor!

LIBRE

Samtang di pa kita segurado karong nagsulat pa niining lindog kabahin sa dagan sa panahon inig Grand Sinulog Parade, dunay maayo kaayo nga balita alang sa tanan nga ganahan nakong mahisgutan karon.

Mao kini ang libreng Internet sa tibuok ruta sa Sinulog, salamat sa usa ka telco nga maoy nipasalig niini. Nakahibawo na man kita nga karong 2012, halos tanan duna nay Facebook ug nagkadaghan ang mag-Twitter.

Nagkadaghan sab ang dunay cellphone nga maka-connect sa Internet busa sayon na kaayong mag-update sa Facebook ug Twitter samtang naglaag-laag sa kadalanan.

Dugang pa, duna say laing telco nga naplano nga manghatag og libreng load anha sa Fuente Osmena circle.

Ha! Libreng Internet ug libreng load panahon sa Sinulog. Asa ka ana.

IMPEACHMENT

Samtang atong gisaulog karon ang pista ni Senyor Santo Nino ug ang Sinulog, atong nasayran nga busy kaayo karon ang lain-laing kampo nga nalambigit sa impeachment trial ni Chief Justice Renato Corona nga magsugod ugma.

Nagkanayon si Totol Ba­tuhan, usa sa mga vo­­lunteer lawyer sa prosekusyon, nga nagpundok sila karon didto sa kaulohan tungod niini. Wa na siya sa Sugbo aron unta moduyog sa kasaulogan sa pista sa Senyor ug sa Gran Sinulog Parade.

Matod niya, naa si Totol nalambigit sa grupo sa mga boluntaryo nga all-around.

Samtang laing Sugboanon nga volunteer, si Rex Fernandez, naa nagboluntaryo kang Kong. Erin Tanada nga usa sa prosecution panel batok kang Corona.

Ato sab nga malantaw nga ang kampo sa depensa kang CJ Corona busy na sab kaayo labi na nga dunay nanggawas nga mga bag-ong expose kabahin sa iyang condo diha sa Global City.

Aron duna kamoy ide­ya kon unsa kining mga bag-ong expose, sud lang sa www.raissarobles.com. (inbetweenco­lumns.wordpress.com)