Espinoza: Pinakagrande nga Sinulog

Monday, January 16, 2012

DAKONG KALAMPUSAN. Ang ika-32 nga Sinulog niadtong Dominggo malampuson ug malinawon. Usa ka dakong garbo alang ni Mayor Mike Rama tungod kay mao ni ang unang Sinulog nga siya ang mayor.

Gani mao ni posibleng hinungdan nga si Kong. Tomas ug Konsehal Margot Osmeña wa na motan-aw sa grand finale sa Sinulog diha sa Abellana grandstand. Di sila gusto mosaksi sa kalampusan ni Mayor Rama.

Have something to report? Tell us in text, photos or videos.

Sa laing bahin, ang ulan wa makapugong ug makapaundang sa kainit sa katawhan sa pag­tambong ug tan-aw sa Sinulog karon tuiga nga midaghan ang entrante gikan sa nagkalainlain dapit dinhi sa kabisay-an.

Gani ang midaog karon tu­iga sa katigoriyang free interpretation mao ang Tribu Lingganay nga taga Alang-alang, Leyte, nga mao pay pag-apil sa Sinulog. Ang midaug sa Sinulog-based category mao ang Culturang Placereño, nga taga Placer, Masbate.

Di na malalis nga ang Sinulog usa na ka internasyonal nga pagasaulogon atol sa pista ni Senyor Sto. Niño. Ang moanhi sa dakbayan duha ang tuyo: ang mamista ug motan-aw sa Sinulog.

Gawas nga grande ug ma­lampuson ang Sinulog, malinawon pa gyud. Nagapasalamat si Cebu City Police chief Melvin Buenafe sa kooperasyon sa katawhan ug sa mga boluntaryo nga mitabang pag-kontrolar sa tumatan-aw sa Sinulog.

Bisan tuod gidid-an ang mga pulitiko sa paggamit sa Sinulog sa ilang personal nga
katuyuan apan di kalikayan ang mga pulitiko nga motan-aw tungod sa kanindot sa mga sayaw ug presentasyon sa matag entrante sa Sinulog didto sa grandstand.

Daghan ang mga pulitiko, mga kongresista ug senador, nga mitambong sa grand finale didto sa Abellana grandstand. Ang uban kanila mao pay pag­tambong apan ang uban makadaghan nang nagbalikbalik.

Si Bise Pres. Jejomar Binay, nga mao pay pag-tambong, daling nakasabot sa patakaran sa Sinulog Foundation. Imbis nga moyawit og daghan igo lang nangayog katahuran sa binisaya ug miingon, “Pit Senyor!” Tungod niini, gitamod siya. Mabuhay ka, Jojo!

Gani si Bise Presidente Binay di makatuo nga ingon ato diay ka grande ug ka nindot ang presentasyon sa mga Sinulog dancers. Ang nahibaw-an sa uban kay ang Sinulog usa lang ka mardi gras.

Sa laing bahin, nakahibawo na ta nga tanang buhat ni Mayor Rama paatbangan gyud ni Tomas. Human sa makabungog nga kalampusan sa Sinulog, unsa na sad kahay isyu ni Kongresista Tomas batok ni Mayor Rama?

Mora na sad ta og nagsunod sa usa ka kulbahinam nga drama sa radyo nga pirmi ta og maghunahuna ug mangagpas sa sunod nga eksena. Si Tomas maayo na siya mangita og depekto. Apan ang problema kay di siya makahibawo sa iyang deperensya.

****

KATAPUSAN. Samtang niad-­tong Dominggo naglipay ug nag­hudyaka ang dakbayan sa Sugbo sa Pista Senyor ug sa Sinulog mardi gras, among gihatod sa katapusang pahulayanan si Na­nay Sisang didto sa sementeryo sa Daanlungsod, Ta­-­bogon.

Si Nanay Sisang, 97, (Basilisa Lobitaña vda de Corbo) ang apohan sa akong asawa, Dr. Malou. Nakabsan sa pagginhawa si Nanay Sisang niadtong kaadlawon sa Sabado. Ang iyang adlawng natawhan Enero 15.

Mao toy una nakong nasaksihan nga lubong nga nanganta og Happy Birthday ang naghatud.

Ang mga apo, anak ug paryente gikantahan og happy birthday si Nanay Sisang usa siya gilas-ong sa panteyon. Pahuway nga dayon, Nanay Sisang!

(elespinoza53@yahoo.com)