Nalzaro: Manna from heaven

Thursday, January 19, 2012

KINSA bay magdahom nga usa ka adlaw niana sa ilang pagpamasura, makapandol sila og mga alahas nga nagkantidad og P2 milyones diha sa Umapad dumpsite sa dakbayan sa Mandaue?

Sila si Rodrigo Corta, Antonio Cuizon ug Eda Montecalvo nahimong instant millionaires.

Have something to report? Tell us in text, photos or videos.

Pero sa hamubo lamang nga panahon. Kay human mapagya nga nakakita sila sa maong mga alahas ug sa dihang ila na kining naprenda ang uban, nanghatag sila sa ilang mga kaubang basurero, nagpakaon ug nagpa-inum, diha nay mga tawo nga nagka-interes.

Gumikan sa pagkatap sa estorya, gipangita sila sa kapulisan ug na-recover sa ilang posisyon ang nahibiling mga alahas. Dihay class ring nga nakataktak ang pangalan ni Vicente Tan. Apan sa dihang gi-adto sa kapulisan si Tan, wala kini mo-angkon sa maong mga alahas. Ang class ring ra maoy iyang gi-angkon. Bisan ang iyang asawa ug anak walay kalibutan sa maong mga alahas. Karon kon dili si Tan mo-angkon o walay mo-claim niini, kinsa man ang manag-iya?

FINDERS, KEEPERS

Base sa Article 719, Republic Act 386 kon Civil Code of the Philippines anaa kining gitawag nga finders, keepers. Kinsa kadtong nakakita  og usa ka butang nga walay mo-angkon, maoy manag-iya sa maong butang nga iyang nakit­-an apan human sa taas-taas nga proseso.

Ang maong artikulo nagkanayon: “Kinsa kadtong nakakita og usa ka butang nga dili treasure, gikina­hanglan kini nga iuli ngadto sa tag-iya. Kon ang tag-iya wala ma-ilhi, gikinahanglan nga ang maong butang i-deposito sa mayor sa siyudad o lungsod diin makit-i ang maong butang. Ipahibalo kini dayon sa mayor ngadto sa publiko pinaagi sa publication o sa media sulod sa duha ka semana.”

“Kon ang butang nga nakit- an posibling madaot sulod sa pipila ka buwan, gikinahanglan kining i-public auction o ibaligya sulod sa walo ka adlaw human kini na-publikar.

Human sa unom ka buwan, kon wala gihapoy motumaw ug mangangkon nga tag-iya, ang maong butang ihatag ngadto sa nakakita.”

MA-ANGKON SA NAKAKITA

Busa pinasikad ning maong balaod sibil, dili pa angayan nga magpaka-wala sa paglaum ang mga basurero nga nakakita niini kay posibli pa kining mabalik ngadto nila. Pero maghuwat pa mo. Kana kon dili sab mawala ang maong mga alahas sa  mga kamot sa mga awtoridad. Ha, ha.

Mao nay gi-ingon nga kining suwerte sa tawo, dili gyud matag-an. Kinsay nagdahum nga adunay bulawan sa basura. Kon sa Tagalog pa, “manna from heaven.”  Suwerte gikan sa langit.

(bobby.nalzaro@yahoo.com)