Mongaya: Impeach-serye

Sunday, January 22, 2012

DUNA koy nadunggan nga nagsigig reklamo nga la­ay ug di sila interesado sa live coverage sa impeachment trial ni Chief Justice Renato Corona apan suweto kaayo sa mga nahitabo. Buot ipasabot, nanan-aw diay. Haha!

Sigi na lang ning nagsigi sa pagreklamo nga ang angayang ma-impeach mao si Presidente Noynoy Aquino ug di angayang gukdon si kanhi presidente Gloria Macapagal-Arroyo tungod sa iyang pagbangkarota sa panudlanan sa Pilipinas ug di angayang patubagon si Chief Justice Corona tungod sa iyang mga way ayong nabuhat isip sakop ug lider sa Korte Suprema.

Have something to report? Tell us in text, photos or videos.

Ang atong hisgutan karon mao kining mga naugkat nga mga kasayuran, mga sekretong nabutyag, kabahin sa mga kalihokan ni Chief Justice Corona.

SALN

Ang labing mahinungdanon nga kalamboan sa miaging semana mao kining pagpugos sa pagkuha sa tinuguang Statement of Assets, Liabilities, ug Net Worth kun SALN ni Chief Justice.

Gimando man gud sa atong Konstitusyon ug balaod nga ang mga opisyal sa kagamhanan nga mosumi­ter ug mobutyag sa ilang SALN. Usa kini sa mga paagi aron masayran kon matinud-anon ba kining mga opisyala ug wa mangilkil sa atong panudlanan.

Human sa dugay nga pagtago-tago sa SALN ni Corona, nakuha gyud sa Impeachment Court nga gilangkuban, subay sa gilagda sa atong Konstitusyon, sa mga senador.

Wa pa man pormal nga matuki ang maong mga SALN ni Corona apan karon makakuha na kitag kopya pinaagi sa pag-download sa Internet ug nakita na nga daghan diay kini og buslot.

BELLAGIO

Sa wa pa ang husay diha sa dakong hawanan sa Senado, niangkon na si Chief Justice Corona nga iyang napalit kining usa ka penthouse sa Bellagio condo diha sa mahalon nga dapit nga gitawag og Global City sa Taguig.

Matod pa ni Corona, ang bili sa maong condo moabot og P14.5 milyones. Apan iya kining gipalit pinaagi sa installment.

Nasayran gikan sa SALN nga wa man gitaho ni Corona kining pagpalit og condo nga P14.5 milyones. Ang napatik sa maong dokumento mao lang ang P6.8 milyones.

Kon wa mamakak (kay nga­nong mamakak man ang labing dakong opiyal sa hudikatura) si Corona, tingale nalimtan lang. Bahala nag supak sa balaod. Tingale subra na gyud kaadunahan si Corona kay makalimot man sa paghisgot nga nakapalit og condo nga minilyon.

Dayon, niingon siya nga ang maong pagpalit gibay­ran pinaagi sa installment. Tingale, nakalimot sab siya nga duna na may Deed of Absolute Sale ang maong condo nga ma-isyo lang kon nabayran og tibuok ang maong property.

Pagkalimtanon gyud di­ay niining Corona.

ASAWA

Bisan og gilagda sa ba­laod nga ibutyag sa SALN ang mga gipanag-iya ug income sa asawa labi na kona naa na kini sa kagamhanan, nilabay ang pipila ka tuig usa pa gitaho ni Chief Justice Corona.

Hinuon, giangkon lagi ni Corona human nabunggo sa miaging 2007 nga duna diay dakong katungdanan sa Arroyo administration dihang nakontrobersyal kini.

Bisan sa iyang paglimod sa pipila ka tuig (ug kini kalapasan sa balaod), sigi na lang kuno kini kay sa ngadto-ngadto, giangkon ra man sab.

Tingale, ingon ana lang gyud siya pagkalimtanon nga bisan ang pag-angkon nga naa sa kagamhanan na ang iyang asawa malimtan sab. Makahinumdom lang kon makontrobersyal.

WORLD BANK

Ang nakapaintriga nako karon mao kining alegasyon sa World Bank nga dunay pipila ka gatos ka libong dolyar nga gi-divert sa Korte Suprema ubos sa liderato ni Chief Justice Corona.

Sa miaging Lunes, gihimakak kini sa Chief Justice kay dugay na kuno ang maong isyo. Hapit na modekada.

Sa sunod adlaw, nika­tap dayon sa Internet ang kopya sa mga dokumento nga nag-ingon nga ki­ning reklamo sa World Bank nahitabo diay sa 2011. Ug gani, nakig-miting na ang mga opisyal sa World Bank kanilang Corona.

Hahay, nakalimot na sab tingale si Corona.

Manghinaot lang ko nga di makalimot ang proseku­syon sa pag-isa sa maong isyo diha sa Impeachment Trial bahala nag mobabag ang mga abogado sa depensa nga gipangulohan ni kanhi Justice Serafin Cuevas.

(politika2013.wordpress.com)