Nalzaro: Palayason kanang mga pari sa Minglanilla

Sunday, January 22, 2012

NAGKAGRABE ug nagka-init karon ang panagsungi tali sa mga sakop sa Team Ministry sa Immaculate Heart of Mary Parish sa lungsod sa Minglanilla ug sa pipila ka mga parokyano nga gipanguluhan sa pipila ka mga aktibong sakop sa Catholic Lay Ministers. Kini human sa gihimo sa mga kapari-an nga pagsaway sa mga lay ministers ug sa mga sakristan nga mibutyag sa mga hiwi ug immoral nga mga kalihukan sa pipila ka mga sakop sa Team Ministry. Mihimo usab og pagpanghulga ang maong mga pari ngadto sa mga sakristan.

Gumikan sa nagka-init nga panagsungi, ang mga lay minister mihimo og signature campaign ug nanawagan sa pagbungkag sa Team Ministry ug pagpahawa sa maong mga pari. Nakahakot na sila og ubay-ubay nga mga pirma ug gani ila naman nga nasubmiter ngadto kang Arsobispo sa Sugbo Bishop Jose Palma. Wala pay aksiyon si Palma kabahin niini kay gisuwayan pa nga mahilot ang maong panagsu­ngi ug mahibalik ang maayong relasyon sa mga pari ug pipila ka mga parokyano.

Have something to report? Tell us in text, photos or videos.

DI NA MAHILOT

Pero sa akong tan-aw morag lisod na kining mahilot gumikan kay natandog na ang garbo sa mga nagkasunging pundok labi na sa habig sa mga pari. Gani sila man ang nagmagahi sa pagpahigayon og dayalogo tali sa mga parokyano nga misaway kanila. Ang mga pari mibawos sa pagsaway sa mga misaway kanila ginamit ang pulpito.
Tiaw ba nimo kanang atol sa ilang homily o sermon, gi-ataki naman hinuon sa mga pari ang maong grupo. Tarong na nimo? Pero wala man usay imposible labi pa kon ang Espirito Santo na ang molihok. Magkauliay man gani sa maayong kabubut-on kanang aduna nay dugo nga mibanaw.

Gi-snub sa mga pari ang mga lay mimister ug mga sakristan nga gusto unta mo-alagad sa simbahan. Dili na nila pakalawaton ug dili na tugutan nga mopakalawat. Mi-abag ang maong mga tawo kay gustong mo-alagad sa simbahan. Unya ilang gidid-an. Kining maong pundok una pa nianang mga sakop sa Team Ministry nga mi-alagad diha sa maong parokya. Karon mas manghawod pa ang mga pari diha? Kining maong mga paria wala masunod kon unsa may gipakaylap ni Kristo.

WALA MAGSUNOD

Di ba atol sa misa ang mga pari kanunay man nga mipahimangno kanato nga gikinahanglan nga ipatigbabaw sa atong kasingkasing ang panaghinigugmaay, panagdait ug panaghiusa? Apan kon unsa man ang ilang gisangyaw, wala kini nila sunda. Kay ila man hinuon nga gipalayo sa simbahan ang maong mga tawo nga ilang gidumtan. Asa man ang panag-inigsuonay diha nga sila man ang naghimo og kalihukan nga magkabuak-buak ang ilang mga parokyano? Siguro aron makab-ot ang kalinaw diha sa parokya ang Minglanilla, mas maayo siguro nga bungkagon kanang maong Team Ministry. Sa laktod nga pagkasulti, palayason kanang maong mga pari. Sulbad ang problema. Amen.

(bobby.nalzaro@yahoo.com)