Espinoza: Si Corona, matangtangan kaha og korona?

Monday, January 23, 2012

CORONA. Ang proseso nga giatubang karon ni Chief Justice Renato Corona sa Senado bisag impeachment kini apan sama ra kini sa usa ka administratibo nga kaso. Kon mapamatud-an nga sad-an si Corona, igo lang siya nga matangtang sa trabaho, dili mapriso.

Angay nga masabtan sa ka­daghanan natong mga kaigsoonan nga ang pamaagi sa pag­presentar sa ebidensya yano ug sayon ra unta dili sama sa kasong kriminal. Apan ang Senado naghimo og ilang ka­ugalingon nga lagda.

Have something to report? Tell us in text, photos or videos.

Dili sad ta mohusga nga di makamao ang mga kongresista nga nag-prosecute sa kaso tungod kay sa una ug ikaduhang higa­yon naglisod sila og presentar sa ebidensya. Akong tan-aw morag nabag-ohan sila nga mag-atubang sa TV kamera. Hehe.

Lahi pay komedya, angayan nga mahuman ang impeachment ni Corona aron atong mahibaw-an ang tinuod nga re­sulta dili sama kang kaniadto presidente Erap Estrada nga wa matapos hangtud gi-people power kunohay siya.

Karon mitim-aw nga dag­han kaayo og kabtangan si Corona nga minilyon ang balor nga wa gideklarar sa iyang SALN. Ang mga titulo sa condo, balay ug yuta mao ni ebidensya nga di na angayan nga iprobar pa tungod kay public document kini.

Tungod niini, daghan ang mitambag nga mas maayo nga manaog na lang si Corona sa iyang pwesto aron di siya mauwawan. Apan nagpagahi man si Corona tungod kay nagtuo siya nga wa siyay sala sa katawhan. Estoryahi!

Apan ang proceso sa impeachment angayan nga atong sundon aron ta makakat-on sa maong proceso ug makahibawo ta kon kining mga kongresista ug senador tinuoray ba nga nagtrabaho ug nagtuon sa maong kaso.

Ang sitwasyon ni Chief Justice Jun Davide ug ni Chief Justice Corona lahi. Sa ato pa dili nato makomparar ang duha ka kaso. Gani ang impeachment ni CJ Davide didto ra kutob sa Kongreso ug wa makaabot sa Senado.

Ang ato lang ipangaliya nga way dautan mahitabo samtang nagpadayon ang impeachment ni Corona. Kon matapos ang impeachment ni Corona bisag unsa pay resulta, makaingon ta nga miabot na ta sa hustong edad sa larangan sa pulitika.

****

Magpasalamat ko sa tawo nga nagtakuban sa ngan nga tabachingching shyshy (tabaching_shy@yahoo.com) sa iyang reaksyon sa akong lindog sa miagi. Klaro nga tawo ni Kong. Tomas Osmeña kay gusto siyang ibalik si Tomas nga mayor sa dakbayan.
Mao ni ang mosunod niyang email nako nga way putol:

“Good day sir elias l. espinoza.. kung e kompara nimu ang nabuhat ni mike rama ug ni tomas osmena?? im sure laban jd kang rama kay c  tomas permi man na nmu birahan hehe.. dba??  sir huna hunaa kuno ang mga nabuhat ni tomas sa cebu dba pwerting dghana. c rama way ayo na cya.. kaw permi lang jd ka laban anang mike rama.. kami mga taga syudad sir osmena gyud me. sa una pame panahon pa sa iyang papa nga si kanhi sen. serging osmena.. dghan kaau na sila ug nabuhat.. g kompara man daun nimu nga malampuson ang sinulog karn kay c rama ang mayor, ngano man d.i ang sa unang mga sinulog dli d.i malampuson?? magkatawa r­man ko nmu sir hhehe.  sa una si tomas permi ninyo sawayon tungod atong plano niya sa south road properties nga nag damgo lang c tomas pero karn na unsa nman?? natuman gyud niya dli lang sa damgo hehe.. mao bitaw sawayon lang ni tomas si mike rama kay kuwang sa pangutok, dili kamao mudala sa syudad.. ikaw ayw cgeg laban ni rama.. kaming tga syudad gusto namu mubalik s tomas sa city hall..”

Aron ka makahibawo taba­chingching wa man koy gilabanan kay opinion man ning among buhat. Gani si Mayor Rama maka­daghan nakong gisaway.

Dili sad nimo makomparar si Tomas kang Mike kay usa pa ka tuig nga naglingkod nga mayor samtang si Tomas kapin na sa 20 ka tuig.

Ingnon tang pung lig-on ug hugot ang pamaagi ni Tomas, apan tan-awa ang dakbayan di ba hugaw kay way landfill? Ang SRP ra man ang giatiman ni Tomas kay mokita ng dakbayan apan ang landfill gikalimtan. Salamat, Tabaching!