Mongaya: Balik sa impeach-serye

Monday, January 23, 2012

MARTES alas dos sa hapon mo-resume ang impeachment trial ni Chief Justice Renato Corona. Maayo ning uban kay wa ma-interesado.

Kini intawong nalingaw sa pagsud-ong sa kasaysayan sa nasud diha sa telebisyon kasagaran sugod inig humag paniudto, wa na say laing ma­buhat. Postpone tanang mga sabot nga mag-miting ngadto sa gabii o sunod buntag o inig Biyernes na lang.

Have something to report? Tell us in text, photos or videos.

Samot pa karong gipaabot ang mga memorandum sa prosekusyon ug depensa niining punto ni kanhi justice Serafin Cuevas nga naa na man ang Statement of Assets, Liabilities, and Networth (SALN) ni Corona sa kamot sa impeachment court, di na kinahanglan ang mga
ebidensya nga magpakita kon matinud-anon ba ang maong dokumento.

Human gitagutagoan ni Chief Justice Corona ang maong SALN, interesado karon ang publiko kon wa ba mamakak siya sa iyang mga entry. Alma lang kon di mo interesado, ha.

Alang kanako, angayang ipa-­dayon ang pagkuha og mga ebidensya kabahin sa mga gipanag-iya ni Corona aron matino kon wa ba siya mamakak sa iyang pagpanumpa nga tinuod ang iyang gibutang sa SALN.

Di man lang intawon igo nga mosumiter ug ibutyag ang SALN. Nasiguro ko nga ang gilagda sa Konstitusyon ug sa atong mga balaod nga kinahanglan ang SALN sa usa ka dakong opisyal way sagol nga pagpamakak.

Sa pagkakaron, gipakita sa prosekusyon nga daghang bakak ang maong SALN ni Corona.

Pananglitan, niingon siya nga P14.5 milyones ang pagpalit sa Bellagio penhouse pinaagi sa installment. Duna na kiniy Deed of Absolute Sale pag-Disyembre 2009. Apan sa iyang SALN sa 2010, gitaho lang ni Corona nga P6 milyones.

Gusto kitang makahibawo niini ug maminaw sab kita sa depensa ni Cuevas. Gusto kitang makahibawo sa rason ni Cuevas nganong di kini pagpamakak. Samtang magtimbang-timbang ang mga senador kon duna bay igong kabug-aton ang mga rason ni Cuevas, mag-analisa sab kita niini.

Apan di gyud sakto kining gusto sa depensa nga di na lang tukion ang SALN kay ang reklamo mao ra kuno ang pagpaguwa niini ngadto sa publiko.

Karong naninguha ang kampo ni Corona nga makakuha sa simpatiya sa publiko, makaingon ko nga sayop gyud kining pugngan ang pagpaguwa sa mga ebidensya.

Ambot kon nakahinumdom ba si Corona ug Cuevas sa se­cond envelop sa paghusay sa impeachment ni kanhi presidente Erap Estrada.

Kay ang mga pro-Erap senators niboto man nga di na kini ablihan, nasuko hinuon ang katawhan ug niulbo ang Edsa 2.

Mao ba kini ang gusto ni Corona? Nga masuko hinuon ang katawhan kaniya? Nakahibawo gyud siya nga ang iyang dag-anan mao ang pagdani sa lima ka mga independent senators aron siya ma-acquit. Apan kon masuko ang katawhan sa ilang pagbabag sa pagpaguwa sa mga ebidensya, siguradong di mopabor ang kasagaran sa mga senador kanila.

Ang mahabilin na lang nga naa kang Corona mao kini si Sen. Lito Lapid ug Bong Revilla nga sakop sa Committee on Silence kay wa makasabot sa nahitabo ug kini si Sen. Joker Arroyo nga kaayado ni kanhi presidente Gloria Macapagal-Arroyo.

Sa pagkakaron ra ba, ako nang nabantayan sa Facebook nga dunay naghisgot-hisgot na sa paglusad og Occupy Sup­reme Court.

Dako ang posibilidad nga di kini modako pag-ayo kon ang publiko kontento sa dagan sa husay sa impeachment court. Apan kon ilang mabantayan nga molampos ang pagbabag sa pagpaguwa og mga ebidensya, nasiguro ko nga dali kaayong modako sulod lang sa pipila ka oras.

(politika2013.wordpress.com)