Nalzaro: Lobo nagtakuban sa pagkakarnero

Monday, January 23, 2012

ANG mga dumadapig sa kaparian diha sa parokya sa Minglanilla niinsister nga black propaganda kuno ang gipakatap nga mga estorya batok sa pipila ka mga sakop sa Team Ministry nga gi-akusahan nga nakahimo og mg imoral nga kalihukan.

Kanang black propaganda sa akong gamay nga pagsa­bot, gipakatap nga mga es­tor­ya batok sa usa ka tawo nga dili tinuod. Gipakatap lang kana aron lang pagdaot ug pagbuong sa kadungganan sa usa ka tawo. Kasagaran kanang mahitabo panahon eleksiyon.

Have something to report? Tell us in text, photos or videos.

Ang mga pulitiko mopagawas og dili mao nga mga estorya aron lang sa pagdaot sa ilang kaatbang.

Black propaganda diay nang adunay tinubdan sa alegasyon nga andam magpaila? Black propaganda diay nang adunay tawo o mga tawo nga andam mobarog og mosuporta sa ilang mga akusasyon batok sa mga imoral nga binuhatan sa mga kaparian sa maong parokya?

Black propaganda diay nanag mismo ang kauba­nang pari labi pa ang team moderator maoy mi-ad­vise sa maong pari nga mopa-ubos sa rehabilitation sa usa ka retreat house didto
sa Oslob aron makahinulsol ug magbag-o?

Black propaganda diay nang mismo si Bishop Jose Palma maoy mimando sa pagpa-ubos sa maong pari sa rehabilitation? Adunay igong sukaranan og basihanan ang mga parokyano sa ilang demanda nga palayason kanang maong mga makasasala nga mga pari.

KINSAY NAMAKAK?

Si kinsa man ang namakak? Kining ilang Team moderator maoy midepensa sa iyang mga kaubanan. Apan walay klaro ang pamahayag. Dayag og klaro kaayo nga namakak. Una mi-angkon siya bisan diri kanako nga ila nang gipadala ang pari nga nasakpan sa mga sakristan nga nagki-esmiringhoy og duha ka babaye sa likod sa simbahan didto sa retreat house sa Oslob. Niingon siya nga dili na makabalik ang maong pari diha sa parokya.

Unya karon moingon na pod siyang tumo-tumo ning tanan. Ug kon tumo-tumo pa, nganong ila mang gipa-ubos sa rehabilitation ang maong pari. Tumo-tumo diay nang tulo nila dunay mga anak? Tumo-tumo diay nang usa kanila certified homosexual? Tumo-tumo diay nang usa kanila gikiha og pagpanglugos? Aber kinsa may namakak? Ug bakak pa kining maong mga akusasyon, nganong dili man sila motubag o ba kaha mokiha og libel? Dili sila angayan nga magtago sa ilang sotana kay sensitibo kining mang isyu. Mga lobo ni sila nga nagtakuban pagkakarnero.

Kanang misuporta sa maong mga pari, pagmata na mo. Unsa may sala ninyo sa Minglanilla nga gihan-ukan man mo diha og mga badlungon og makasasalang mga pari?

(bobby.nalzaro@yahoo.com)