Nalzaro: Resulta sa pagdali-dali

Wednesday, January 25, 2012

SA atong pagsunod sa nagpadayon nga impeachment trial batok ni Supreme Court Chief Justice Renato Corona atong na-obserbahan nga dili preparado ang prosecution sa ilang mga argumento ug ebidensiya batok kang Corona. Sa unang semana sa husay, dayag kaayo nga walay dag-anan ang mga congressmen-prosecutors sa mga abogado ni Corona. Ambot kining mga congressmen-prosecutors kon nag-practice ba kini sila sa ilang abogasiya sa wala pa sila mamahimong kongresista. O ba kaha wala kini sila makatunob sa korte o nakalimot lang kaha sila sa estratahiya sa sulod sa korte.

Lahi man god ning aduna kay kasinatian o batid ka diha sa sulod sa korte kay aduna man usab kini taktika. Ang mga abogado ni Corona nga gipanguluhan ni kanhi Supreme Court Associate Justice ug kanhi Justice Secretary Serafin Cuevas mga batid kaayo. Kanunay god tawong masupalpal ang mga kongresista. Ug sa mga sugarol pa, morag logro, 7-10 pabor sa depensa.

Have something to report? Tell us in text, photos or videos.

SALN

Ang usa sa mga kaso ni Corona mao ang wala niya pagdeklarar sa iyang statement of assets, liabilities and net worth. Karon naprobahan man nga misubmiter diay siya base sa mga dokumento. Kon buot sabton, absuwelto na unta siya kay naprobahan man nga naka-file diay siya. Apan gipangitaan gihapon og lusot sa prosecution. Adunay mga ill-gotten wealth si Corona nga wala niya madeklarar.

Diha na usab siya gigukod kay nakahimo og graft and corruption. Unya kay wala man kanang puntuha maapil sa gi-aligar sa Articles of Impeachment. Mi-ingon si Cuevas nga dili  sila mo-argue ana kay wala man kana sa alegasyon batok ni Corona. May punto.

Buot sabton nga nganong modepensa man sila nga wala man na sa akusasyon. Kining pagkasupalpal sa taga prosecution mao na kini ang resulta sa pagdali-dali pagpasaka sa maong Articles of Impeachment nga wala gyud estudyuhi og maayo og wala mangandam sa mga gikinahanglan nga ebidensiya. Tiaw nimo nang si Kong. Neil Tupas ang lead prosecutor nanghangyo nalang sa Impeachment Court nga med­yo luagan ilang lagda.

GIDALI-DALI

Gidispuga ang pagpasaka og kaso batok ni Corona gumikan sa mando ni Presidente Noynoy Aquino kay si Corona babag sa ilang paglutos ni kanhi Pres. Gloria Macapagal Arroyo.

Kay kon gisunod pa nila ang insaktong proseso sa impeachment dili unta sila magkabikus-bikus. Kon gi-refer pa kini sa Committee on Justice ma-estudyuhan unta kini og maayo.

Pero gumikan lagi kay mando man ni PNoy maong gidali. Unya na-unsa naman kini karon?

Gi-lecturan pa sila ni Sen. Meriam Defensor Santiago. Mao nang dili ta matingala nga ma-absuwelto si Corona inig hukom na.

(bobby.nalzaro@yahoo.com)