Nalzaro: Mga kodaker ug maniniyot

Thursday, January 26, 2012

ANG cellular industry dag­han kaayong gipamatay nga laing industriya. Niadtong sa-­yong bahin sa dekada 90, dihay paging industry. Ang Easycall ug Pocketbell mao ang nagkompetensiya niadto. Apan sa pagsulod sa SMS kun short messaging system gamit ang cellular phone, nawagtang ang maong industriya. Mogamit pa man god ka og telepono niadto unya moagi pa sa ilang operator. I-screen pa ang imong mensahe. Dili ka makapadala og mensahe nga law-ay kay dili dawaton o i-dispatch sa operator ngadto sa imong padalhan.

Unya magpanagana ka pa mopadala og mensahe para sa imong uyab o hinigugma kay i-agi pa man sa ope­rator. Walay privacy. Dili sama sa cellphone nga ikaw ra ug ang imong padad-an ang mahibalo. Apan una niini, napatay usab sa cellular phone ang telegrama. Ang kusog niadto mao ang RCPI, PT&T ug ang Bureau of Telecommunications nga iya sa gobiyerno. Sa dihang estudyante pa ko, kon mangayo ko og kuwarta sa akong ginikanan pinaagi sa telegrama, duha ra ka words ang isuwat kay dako man og bayranan kon daghan.

Have something to report? Tell us in text, photos or videos.

“Send money” ra gyod. Kon emergency, mubo ra ang isuwat. “Uli, tatay patay” Ang long distance kaniadto puwerting mahala matag minuto.

KODAK

Kinsa bay magtuo karon nga ang Kodak Films, usa sa pinakadako nga film manufacturer sa tibuok kalibutan, modeklarar og bankruptcy? Wala pa ako matawo, diha nay Kodak. Ug gani kining litrang Kodak, naglambigit kini og picture o hulagway. Ang mga tawo mo-ingon, “Kodaki mi be.” Inay mo-ingon litratohi mi be. O hulagwayi mi. Nagtuo ang uban nga ang kodak nagpasabot og picture o hulagway.

Sa akong pagtuo usa sa mga hinungdan nganong nabangkaruta ang Kodak gumikan sa pagsulbong sa mga high-end nga mga gadget. Sama aning mga bag-ong computer, cellular phones labi pa kining iPhone ug iPad nga dili lamang pangtext kon dili  magamit usab isip camera. Unya ang mga camera karon wala na magkinahanglan og film kay digital naman tanan. Mokuha ka lang og hulagway gamit ang imong cellphone. Unya imong ibalhin sa computer pinaagi sa USB, aw imo nang makita.

EPEKTO

Kining pagkasira sa Kodak dako usab kini og epek­to sa mga nanginabuhi sa film industry sama sa mga litrarista diha sa Cathedral ug Plaza Independencia o sa mga simbahan nga mangudak kon adunay okasyon. Sama sa kasal ug bunyag. Ug sa mga film developers, unsaon man nila pagpanginabuhi nga wala naman kaayo silay kustomer gumikan kay halos naman tanan karon adunay cellphone o digital camera? Well, mao gyud kini ang premyo sa paglambo sa teknolohiya. Pero bisan pa og manira ang Kodak films pero ang pulong ‘kodaker’ nga nagtawag sa mga photographers magpabilin sa gihapon kay nahimo na kining tipik ug kabahin sa atong henerasyon. ‘Kodaki ko beh’.

(bobby.nalzaro@yahoo.com)Sent from my iPad