Mongaya: Miriam ug Lito

Saturday, January 28, 2012

ABI sa akong amigo nga sabungero nga ang magdalag thrilling sa impeachment trial mao si Sen. Bong Revilla. Matod pa niya, samtang siguradong matinud-anon kini si Sen. Lito Lapid nga sakop sa Committee on Silence, posibleng motingog si Sen. Bong Revilla.

Apan dako siyang sayop sugod sa miaging Martes. Nitambong si Sen. Miriam Defensor-Santiago.

Have something to report? Tell us in text, photos or videos.

Absent sa impeachment hearing ang senadora sa unang semana kay nisaka ang iyang blood pressure. Apan dihang nitambong siya, ang senadora wa mag-usik sa panahon sa pag-lecture sa tanan kon unsa kining impeachment court.

Makalibog kay samtang niingon siya nga di angayang magsubra ka estrikto labi na sa pagpaguwa sa mga ebidensya sama sa nahitabo sa impeachment trial ni kanhi presidente Erap Estrada, nisaka pagmaayo ang iyang blood pressure dihang nangasaba sa prosekusyon.

Daw terror teacher si Miriam nga nangasabag balik-balik sa mga sakop sa prosekusyon sulod sa tulo ka adlaw nga nagbista ang impeachment court.

Dunay mga kaila nga niingon nga thrilling kuno kon motindog si Miriam kay siguradong makapisos na sab ang prosekusyon.

Alang kanako, si Miriam maoy naghatag ka alegre sa proceedings sa miaging semana.

Hinuon, mosulti gyud ko karong tungora nga laing nakakuha sa akong atensyon mao ang testigo sa prosekusyon ug BIR chief Kim Henares kay bisan giunsa siya sa paggaling sa mga senador ug ni kanhi justice Serafin Cuevas sa depensa, wa siya mokanga, wa matarantar, ug kalmang nitu­bag sa mga pangutana.

Tungod ni Henares, niguwa na karon ang kamatuoran nga sa kadaghan sa gipanag-iya ni Chief Justice Renato Corona, gamay ra siyang gibayad og buhis. Ug ang pangutana, giunsa man niya pananglitan pag-angkon sa penthouse sa Bellagio?

Hinuon, di pa matino nga ill-gotten ba gyud kining iyang mga kabtangan nga gipangyagyag diha sa Impeachment Court. Maghulat una kita sa mga ebidensya ug testigo sa depensa. Basin diay makapakita kini si Corona nga nidaog ba siya kintahay og lotto.

Sa usa ka pundok-pundok sa miaging semana, dunay laing kaila nga niingon nga nakalibre kuno ang usa ka opisyal nga gipasanginlang kurakot kay nakapakita og winning lotto ticket.

Mag-expect sab ko sa prosekusyon nga ma­ngaykay na sab sa pagpamatuod nga pinalit ang maong ticket gikan sa tinuod nga nakadaog. Ang labing sayon nga bawos mao ang pangutana nganong wa kini gilagda sa iyang statement of asset, liabilities, and networth kun SALN. Haha!

Sa SALN, dunay gihisgutan nga si Corona nangutang og P11 milyones gikan sa kompanya sa iyang asawa. Ang nakaapan lang kay gibunggo kini ni Raissa Robles diha sa iyang blog nga raissarobles.com diin gitaho nga way kla­rong record sa Securities and Exchange Commission (SEC) ang maong kompanya ug uban pang mga discrepancies.

Kay kinahanglan man lagi kitang mo-presume nga inosente si Corona hangtod nga mapruyba nga sad-an, ibutang lang una nato nga dunay mga lehitimong tinubdan siya og minilyon nga subra pa sa iyang sweldo.

Hangtod pagka Huwebes, nag-atang gyud ko nga basin motingog si Senador Bong. Matod pa, gusto man kuno kining modagan og mas dakong posisyon busa angayan na siyang magpakitang gilas.

Apan walay Senador Bong nga nitingog.

Nakalitan na lang ko dihang gibalita nga ang asawa ni Senador Lito Lapid nasikop diay didto sa Estados Unidos kay nasakpan nga nagdalag $40,000 nga gitaho sa Customs. Laing higala ni-estimate nga moabot kini og P2 milyones pesos.

Ug ang hilumon nga si Sen. Lapid, dihang gi-interbyu sa mga sakop sa media, maayo kaayong naka-esplikar ginamit pa ang Iningles.

Oy, duna man diay kiniy klarong tingog. Di lang gyud niya gamiton ang iyang kaantigo diha sa Impeachment Court.

(politika2013.wordpress.com)