Nalzaro: Termino sa mga opisyal sa barangay

Saturday, January 28, 2012

ADUNAY sugyot balaodnon karon nga mag-uktaba o mag-postponed sa barangay election nga gikatakda sa buwan sa Oktobre sa 2013.  Ang barangay election nagsunod kini sa regular mid-election sa buwan sa Mayo sa mao gihapon nga tuig. Si Cebu City North district Congresswoman Cutie Del Mar maoy usa sa mga nangamahan sa maong balaudnon. Aduna say gisang-at nga balaudnon nga maghimo og lima ka tuig sa termino sa mga barangay officials gikan sa tulo lamang ka tuig nga three-terms. Sama sa ubang mga local officials ug mga kongresista, mosilbi balig tulo ka termino ang mga barangay officials. Siyam ka tuig tanan kon walay putol-putol.

Ubos sa maong balaudnon himuon nang lima ka tuig ang matag termino sa mga barangay officials ug ka-usa ang re-election. Kon ma-straight, nahulog nga napulo ka tuig ang serbisyo. Morag taas ra man na kaayo. Kanang lima ka tuig nga termino, taas ra kaayo sa bati ug dili maayong performance sa mga opisyal. Sa pikas nga bahin, mubo ra usab kana nga pagserbisyo sa mga maayo og binuhatan. Pero para nako, dili na kinahanglan pang usbon kining termino sa mga barangay official.
Okey ra man ni ba.

Have something to report? Tell us in text, photos or videos.

POSTPONED

Ang rason kon nganong ipa-uktaba ang barangay election gikan sa 2013 ngadto sa 2014 gumikan sa gasto. Kay lagi magpahigayon man og midterm election sa Mayo sa mao gihapon nga tuig. Gasto sa gobiyermo sa pagpahigayon sa eleksiyon o ba kaha gasto kanilang mga pulitiko? Ang mga modaog nianang Mayo nga eleksiyon mao kana ang sandigan sa mga gustong mokandidato sa barangay. Mo-ingon sila nga non-partisan ang barangay election. Non-partisan god tawon nga ang mga pulitiko man ang nagpaluyo sa mga opisyal sa barangay.

Ang gustong mokandidato moduol sa ilang mayor ug kongresista o ba kaha sa gobernador aron mangayo og funding. Busa sa maong tuig, bogbog sarado ang mga pulitiko. Nakagasto pa sila sa ilang kandidatura sa eleksiyon sa Mayo unya sa pagka-Oktubre gasto na pod. Matod pa ni kanhi Mandaue City Mayor Alfredo ‘Ingko Pedong’ Ouano nga ‘wala pa gani maayo ang labhag sa latus, latuson na usab sila.’ Sakto gyud. Naglikay na sila sa gasto.

PAPEL

Kining pagpili og mga opsiyal sa barangay dili baya angay kining yama-yamaan. Dako ug importante kining papel nga ilang gidala. Ang barangay mao ang pinaka-gamay nga local government unit. Diha magasumikad ang gahum sa katawhan. Mismo ang barangay captain dako kaayo og papel nga gihuptan. Naa niya ang gahom sa ehekutibo, magbabalaod og ingon man sa husgado. Ang kapitan maoy mo-implementar sa mga balaod. Exe­cutive function kana. Apil siya sa pagpanday og balaod kay siya man ang mo-preside sa konsiho. Legislative function kana. Unya siya usab ang tighusay kon adunay magkasungi nga pamilya ug silingan nga iyang konstituwente. Judicial function kana. Busa angay nato na sila hatagan usab og importansiya ug tarungon pagpili.

(bobby.nalzaro@yahoo.com)