Obenieta: Kuwarta padala, pakapin kabalaka

Sunday, January 29, 2012

SAYOD ta nga sagad sa atong kaigsoonang Pinoy ang nanimpalad ngadto sa laing nasod aron mahaw-as sa kalisod. Maoy tuyo dili lang ang kaugalingong kauswagan; apil pod ang pag-abaga sa ilang kabanayan nga gahuwat sa grasyang padala. Dayag nga dili bulatik lang ang pasidungog sa  kagamhanan alang sa mga Overseas Filipino Workers (OFW) isip mga “bag-ong bayani.” Dili baya tawon lalim ang ilang gisagubang—kami­ngaw ug kabalaka sa mga dapit nga layo ug langyaw—aron lang mapiskan sa duga sa ilang pasingot ang ilang mga minahal nga gapaabot og sustento. Iyawat na lang intawon makabulig sa inadlaw nga panginahanglan, makapalit og tambal, makabayad sa tunghaan, ug uban pa.

Samot gyod kaunlod ang ang ekonomiya sa nasod kon dili molutaw ang pagpaluyo sa mga mga OFW. Nayabag na kon sila nga mitabang mao na hinoon ang tabangonon.  

Have something to report? Tell us in text, photos or videos.

Bag-ohay lang, ako ug ang akong kapikas nga magtutudlo sa Topeka (Kansas) lupig pa’y gilumsan sa kabalaka dihang among nahibal-an ang gidanga­tan sa among gipadalang kwarta alang sa among banay dinhi sa Sugbo. Napugwat among hagok dihang gitawagan mi sa akong bayaw nga maoy gi-authorized kun gisaligan namo nga modawat sa kuwarta nga gipadala namo pinaagi sa usa ka online money transfer service .

Matod pa niya, dihang kobrahon na unta niya ang among gipadala, giingnan siya sa kawani sa inilang dakong ahensya nga nagbase sa Sugbo nga wala na ang kwarta. Naa na kuno’y ni-claim. Ay, naunsang pagkaunsaa?

Ang akong bayaw ra man unta’y among gihinganlan sa Xoom.com nga mao’y among sinaligan pagkobra sa kuwarta. Isip pagpamatuod sa iyang pagpaila, duna pod siya’y valid I.D. nga gidala.

Gidabo-dabohan namo’g tawag ang Xoom.com hangtod ang ilang customer service, pinaagi sa ilang mga Pinoy nga call agents, nitug-an namo sa ilang nasuta: Gipalusot diay sa sanga sa ahensya nga didto sa Pampanga ang among kuwarta.

Kon giunsa kini pagmaniobra, kutob ra mi sa pangambot gawas sa among kabalaka ug pagduha-duha nga basin duna’y kamatuoran ang pangagpas sa among kahigalaan: Basin duna’y “inside job” sa maong lokal nga ahensya. Basin gi-hack ang ilang computer.

Aron makabaton og katin-awan, gapunay mi’g tawag sa customer service sa Xoom.com. Apan sagad makaluya ilang pagtagad. Kasagaran lubog kaayo ilang tubag. Usahay mapahitas-on og tono.  Mao nga nidangop mi sa Better Business Bureau

(http://goldengate.bbb.org) aron masibog among mulo. Kaluoy sa Diyos, nabalik ra gyod hinuon ang kwarta pinaagi sa “money-back guarantee” sa Xoom.com.