Espinoza: Nagsugod na ang kumbati

Monday, January 30, 2012

BASURA. Ang dakbayan sa Sugbo ug Mandaue nga nanira na sa ilang labayanan sa basura, tua na maglabay sa ilang basura sa landfill nga naa mahimutang sa bukiran sa Consolacion.

Abi nako ko og moderno na ta sa paghipos sa atong basura subay sa balaod, RA 9003. Apan landfill lang gihapon ang pamaagi nga nahibaw-an sa atong mga lokal nga kagamhanan.

Have something to report? Tell us in text, photos or videos.

Sa landfill igo lang ilabay ang nagkadiyang mga basura. Inigkapuno sa landfill, isira na usab ug mangita na sad og laing dapit nga himuon nga landfill.

Angayan na unta nga i-implementar sa kagamhanan ang giingon nga 3Rs (reduce, reuse ug recycle) sa basura aron maminus ang hugaw ug maampingan ang atong kalikasan.

Gani ang mga residente sa Consolacion nga maagian sa mga trak de basura sa dakbayan sa Sugbo ug Mandaue mireklamo na sa baho ug hugaw nga mga natagak sa kadalanan.

Gipasupot ni Bokal Teddy Ouano sa miagi ang reklamo sa mga residente kabahin sa baho
ug hugaw sa basura nga gihatod didto sa landfill sa Consolacion.

Kini tungod kay ang gikargahan sa basura mga ordinaryong dump truck lang dili kadtong mga trak nga alang sa basura nga serado ug way baho ug hugaw nga matagak inigbiyahe.

Tungod sa paglabay sa basura sa dakbayan sa Sugbo ngadto sa landfill sa Consolacion, nahimong komedya ang gihimong dakop sa dakbayan sa Mandaue sa ilang mga trak de basura.

Matud pas komedya nga seloso ang Mandaue kay di sila gusto nga dunay karibal sa paglabay sa basura ngadto sa landfill sa Consolacion.

Naa na tay daghang balaod aron maprotektahan ang atong kalikasan. Apan ang problema kay ang atong mga piniling opisyales mas nagpakabana sa ilang kaugalingon nga kaayuhan kay sa atong kalikasan.

Tungod sa sistema sa atong pamulitika, ang mga pulitiko (pwera sa maayo) ang ilang pirmi nga gitan-aw kon unsaon pagdaug sa piliay. Magsige lang ni sila og papogi points
sa media bisag way nahimo.

****

KUMBATI. Sa Mayo 2013 pa ang sunod nga piliay. Apan pagsulod pa lang sa tuig 2012 nagsugod na ang mga pulitiko og ihap sa ilang sumusunod ug kumbinsi sa wa pa madani ngadto sa ilang kampo.

Sa wa pa moanunsyo si Kong. Tomas Osmeña nga mo­da­gan siyag balik pagka mayor sa dakbayan, nagsige na siya og tuyok sa kabarangayan aron pagsuta kon ang iyang sumusunod naa pa gihapon sa iyang kampo sa BO-PK.

Gani atong mahinumduman nga si Kongresista Tomas gibalita nga nalipung samtang nagsuroy-suroy didto sa kabukiran sa dakbayan sa Sugbo.

Matod pa sa akong kaistorya nga usa ka barangay opisyal (di lang nako hinganlan) nga nagsige na og patawag og miting si Tomas sa mga barangay opisyales nga iyang kaabin.

Ang akong higalang baran­gay opisyal gikumbinsi ni Tomas ug ni Bise Mayor Joy Young nga padaganon og konsehal sa linya sa BO-PK sa Mayo 2013 nga piliay.

Ang kampo ni Tomas gisakitan og maayo sa pagbiya ni Mayor Mike Rama sa BO-PK. Si Tomas gusto nga ilubong si Mayor Rama sa sunod piliay aron siya mauwawan.

Naningkamot og maayo si Tomas ug iyang mga kaanib nga di makakuha og mga maayong kandidato si Mayor Rama alang sa iyang linya sa Mayo 2013 nga piliay. Matod pa sa akong amigo nga grabe na ang mga intriga nga ilang gipalakaw.

Ang kadtong dunay intensyon nga modagan sa linya ni Mayor Rama duna nay gipa­abot nga estorya nga duol-duol ra sa bahad. Apil na niini ang mga negosyante nga mosuporta ni Mayor Rama.

Dunay usa ka potensyal nga kandidato pagka konsehal sa dakbayan sa Sugbo apan mibalibad sa imbitasyon ni Tomas tungod kay di siya gusto nga himuon unya nga itoy ni Tomas.

(elespinoza53@yahoo.com)