Mongaya: Unsaon kaha pagdepensa ni Cuevas?

Monday, January 30, 2012

HUMAN nga nagsige sa pagkasayop ang prosekusyon sa miaging duha ka semana, nakalitan kita pag-resume sa impeachment trial kay nikalit man pagkahanas. Hinuon, dunay mga bag-ong nawong ang prosekusyon nga pahimutang nga nipagawas sa mga ebidensya.

Ni-text ko kang Atty. Totol Batuhan, usa sa duha ka mga Sugboanon nga volunteer lawyer sa prosekusyon, kabahin sa nahitabo sa impeachment trial kagahapon. Nitubag siya nga nagkaklaro na ang duha ka mga pattern.

Have something to report? Tell us in text, photos or videos.

Una, matod niya, dunay pattern nga ang mga kabtangan sa mag-asawang Corona nga di masuportahan sa ilang mga kita.

Ikaduha, dunay dakong ka­­lainan sa mga entry diha sa gipanumpaang statement of
assets, liabilities, and networth (SALN) kabahin sa bili sa maong kabtangan ug ang aktwal nga bili niini nga diha sa mga dokumento ug gikumpirmar sa mga testigo.

Tungod niini, nakapangutana ko sa akong kaugalingon kon unsaon kaha ni kanhi justice Serafin Cuevas sa pag-esplikar sa maong mga kalainan.

Sa pagkakaron man gud, moguwa nga daw namakak si Corona diha sa SALN nga unta gipanumpaan man niya nga tinuod ang mga entry niini.

Nagkaanam sab pagkahulma ang pagtan-aw sa publiko batok kang Chief Justice Corona ug nagtuo ko nga lisod na sila patuohon sa pag-esplikar unya ni Cuevas.

Lisod man sab gud bang­gaon ang kalaki sa prosekusyon nga ang mga dokumento maoy gipabantang aron moguwa nga namakak diay si Chief Justice Corona.

Mas maayo man ang depensa mobali-bali sa pagpangu­tana sa mga testigo. Apan kon dokumento na ang ipakita, ang-ang lalison pa niya nga bakak ang mga unod sa maong mga dokumento.

MEDIA

Sa ingon niini nga proceeding, di kalikayan nga ma-isyo ang mga sakop sa media. Sa miaging semana, nireklamo si Senador-Juror Joker Arroyo nga­nong duna dayoy mga kopya ang mga sakop sa media sa mga dokumento nga gipang-sumiter ngadto sa Impeachment Court.

Nanghimakak ang mga sa­kop sa prosekusyon ug sa de­pensa. Apan klarong gidu­da­han ang mga sakop sa pro­­sekusyon nga sila.

Apan nagduda ko nga kon di ang prosekusyon, di ba posible nga dunay mga sakop sa Senado nga maoy nihatag. Kahibawo na man kita nga kining mga sakop sa media nasuod na sab sa mga senador ug dako ang posibilidad nga senador ang nihatag.

Dihang atong gipangutana si Totol Batuhan kabahin niini, niingon kini nga posible lang sab gyud nga maayo mokuha og mga dokumento ang mga sakop sa media nga nag-cover.

Matod pa niya, alas 8 sa buntag pa lang, nag-atang na ang mga sakop sa media sa pagsumiter sa mga ebidensya nga markahan diha sa staff sa Impeachment Court.

Di ko mahibulong niini kay bisan sa mga ordinaryong sesyon sa Konseho sa siyudad ug sa hunta probinsyal ug dunay mga kontrobersyal nga hisgu­tanan, ang mga maayong laki nga reporter duna nay gitamdan nga kopya inig sugod sa sesyon.

Kaniadtong reporter pa ko nga nag-cover sa sesyon sa Konseho sa Syudad sa Sugbo, inig human nakog kuha og kopya sa agenda, moadto dayon ko sa akong mga paboritong staff sa mga konsehal ug mamarayg og xerox copy samtang ang akong mga kaubang reporter niadtong higayona adto sab mangayo sa council secretary.

TESTIGO

Laing isyo nga nitumaw ka­bahin sa media mao ang pag-apil sa pipila isip testigo sa prosekusyon. Samtang gusto ang mga sakop sa media nga tig-cover sila sa daplin, gusto sa prosekusyon nga pipila kanila himuong starring sa hearing.

Ang pagdumili sa pipila nga mahimong testigo giisip dayon sa depensa nga nangisda lang gyud ang prosekusyon.

(politika2013.wordpress.com)