Nalzaro: Binuang ni Jun Pe

Monday, January 30, 2012

TAN-AWA ra kining kaboang aning Kong. Tomas Osmeña. Usa siya ka magbabalaod apan misuporta siya aning hinanggaw nga plano sa iyang alipores nga si Cebu City Councilor Augustus Pe Jr. Si Konsehal Pe nagplano nga modagan sa pagkakonsehal sa south district karong 2013 election inig ka human sa iyang termino sa north district. Ang mga lokal nga opisyal gidid-an nga makalansar kon matapus na ang ilang tulo ka termino.  Apan si JunPe wala manumbaling niining maong probisyon sa Local Government Code ug mismo sa atong Batakang Balaod.

Kay ang iyang rason nga magpapili siya gumikan kay aron kuno mapadayon ang iyang pagserbisyo sa katawhan kay daghan pa siyang tahas nga iyang ipadayon. Serbisyo o personal nga motibo? Siyaro man usab og wala siyay delicadeza. Wala na gyud siya laing panginabuhian og wala siya sa pulitika? Ngano ang uban wala man mohimo ana? Mipahuway sila human sa ilang termino. Gumikan kay adunay silay ka-uwaw. Apan kini si JunPe, pastilan pabaga lang sa nawong. Minarama ning iya. Nawili sa gahum.

Have something to report? Tell us in text, photos or videos.

MISUPORTA

Unya si Tomas nga usa ka kongresista mipadayag sa iyang suporta. Nasayod ba si Tomas kon unsa ang gahum nga iyang gihuptan karon? Tigpanday og balaod. Kanang balaod nga nagsitar sa term limit sa mga piniling opisyal, gipanday kana sa mga magbabalaod.

Hinoon, wala siya niadto sa Kongreso. Iya unta nga badlungon kana si JunPe nga dili modayon sa iyang plano. Iya god nang bata-bata. Maminaw na niya. Aw, kon dili magpabadlong dili niya i-apil sa iyang lineup. Iya man hinoon nga gisuportahan.

Sigurado nga moabot kini sa korte kon adunay mopetisyon sa panahon nga mo-file na sa iyang kandidatura si Jun Pe. Matestingan gyud ang balaod kabahin niining term limit.

Apan nganong paabton pa man god ni sa korte kon aduna lay delicadeza ang maong pulitiko? Dili na siya magpatuga-tuga og lansar. Sus, kon simbako nga walay mo-protesta o ba kaha dapigan si JunPe sa korte, kadakong baliw nining maong balaod.

Sadya ning mga pulitiko. Balhin-balhin lang. Magpabuot sa ilang gusto.

GIYERA NA

Mideklarar na si Kong. Tomas Osmeña sa iyang interes nga magpapili pag-usab pagkamayor ning dakbayan sa umaabot 2013 election. Iya gyud nga atbangan si Mayor Mike Rama. Aw, mas maayo nga sayo nga mideklarar si Tomas. So, nakita na gyud nato nga ang iyang mga pagpanghilabot kaniadto sa mga kalihukan sa City Hall adunay diay nagpaluyo nga personal ug pulitika nga motibo. Nanghambog pa si Tomas nga yano niyang pildihon si Mike og iyang lisud-lisuran pagpangita og runningmate og lineup sa mga konsehal.

Naghinambug na si Tomas. Aw, makita ra unyang katag ana.

(bobby.nalzaro@yahoo.com)