Nalzaro: Supalpal ang pulis

WALA gyud ko masayop. Ako nang gitagna ug gihimadlan daan nga ang kasong qualified theft nga gipasaka sa kapulisan batok sa guwardiya sa Cebu City Sports Complex nga gi-akusahan nga maoy mikawat sa P1.6 milyones nga pundo sa Sinulog Foundation ma-dismiss gyud. Ug mao gyud ang nahitabo. Dakong tamparus kini sa atong kapulisan. Mao na kini ang resulta nianang dinali-dali. Supalpal noon ang kapulisan. Ako nang gitambagan ang kapulisan nga ilang palawuman ug palapdan ang imbestigasyon aron maayag ang tanang mga anggulo. Wala lang unta nila i-focus sa guwardiya ang ilang imbestigasyon.

Gumikan lagi kay gustong magpapel ang kapulisan sa atong mga opisyal ug sa katawhan nga dali ra nilang masulbad ang kaso, ila dayon nga gisang-at ang kaso. Bisan kon walay lig-ong ebidensiya. Sa mga affidavit sa mga tawo nga ilang na-imbestigar, wala gyuy mitumbok kang Joselyndon Jabagat nga maoy nag-abre sa vault og mikuha sa kuwarta.

Gitumbok lang nilang natulog si Jabagat samtang nag-duty mao nga wala niya mabantayi kon si kinsa ang mikuha sa kuwarta human lugita ang cash vault. Dili krimen ang matulog.

BALIK SA SINUGDANAN

Hinoon, dili pa mahulog sa double jeopardy kining kaso mi Jabagat kay naa pa man kini sa piskaliya. Puwede pa siyang mapasakaan og kaso kon makapangalap og lain ug dugang ebidensiya ang mga pulis. Mahulog lamang nga double jeopardy kon ang kaso nadesisyonan na sa korte. Ang buot ipasabot aning double jeopardy nga dili na mapasakaan ang usa ka tawo sa susamang krimen kon siya na-absuwelto na niini sa hukmanan.

Ang himoon karon sa kapulisan mao ang pag-im­bestigar og balik sa maong kaso aron makakuha sila og bag-ong ebidensiya aron masuta kon si kinsa ang nagkawat sa maong kantidad. Pero ang taga National Bureau of Investigation (NBI) nangutana kon nasulod ba gyud ang maong kantidad sa vault? Tinuod ba nga diha ang kuwarta? Basin gilungkab-lungkab lang ug gipagawas nga gikawat apan diay yano lang nga gisulod sa bulsa sa usa ka empleyado ang maong kantidad. Back to square one ang mga pulis. Basin kadtong resulta sa polygraph o lie detector test makahatag tog giya sa kapulisan sa tinud-anay nga kawatan.

LAHI ANG IMBESTIGASYON

Bisan ang piskal nakasaway sa imbestigasyon sa kapulisan. Bisan ang vault nga gilungkab wala i-presentar isip ebedensiya. Mao bitaw na nga kanunay natong pahimangnuan ang kapulisan nga lahi ang imbestigasyon ug lahi usab ang prosecution og ingon man ang paghusay sa kaso sa husgado. Unsa-on man pag-prose­cute sa mga piskal sa usa ka kaso kon walay ebidensiya nga gisang-at ang kapulisan? Magkapuliki ang mga piskal inig husay na sa korte. Mas maayo gyud nga ang kapulisan andam nang daan sa mga ebidensiya sa dili pa isang-at ang kaso sa piskaliya og dayon na sa korte.

(bobby.nalzaro@yahoo.com)Sent from my iPad)