Nalzaro: ‘Oplan I Love You’ sa LTFRB 7

Thursday, February 2, 2012

GIPAHIBALO sa mga opis­yal sa Land Transportation and Regulatory Board (LTFRB 7) nga molusad sila og “Oplan I Love You” atol sa kasaulogan sa Valentines Day, Pebrero 14.

Ang “Oplan I Love You,” gi­tu­­mong aron pagpakgang ug pagdisiplina aning nga abu­sado ug bentahosong mga ta­x­i drivers nga mosingil og dakong plitihan sa mga tawo nga mosulod og mga motels. Basta Valentines Day gani, puno man gyud ang motels. Ambot og un­­say himuon sa mga manag­hinigugmaay, manag-uyab o magtiayon sud sa motels.

Have something to report? Tell us in text, photos or videos.

Magrosaryo siguro.

Matod ni LTFRB Regional Director Ahmed Cuizon pinaagi sa executive assistant niini nga si Joy Tumulak nga mopakatap sila og mga personnel sa mga plaza ug mga motels diin kasagaran moadto ang mga tawo aron maglingaw-lingaw. Mohatag sila og information sheet sa mga pasahero nga mogawas gikan sa mga motel ug ilang pangutan-on kon wala pa sila pangayo-i ug taas nga plitihan. Tiaw nimo kanang tag P2,000 ang pangayuon sa ubang mga drivers. Dili man god intawon ka balibad ang mga pasahero. Kay kon dili sila mosugot, dili man mopasakay nila ang taxi drivers.

MANGABUNGGO

Kon walay mopasakay kanila, unsa-on man nila paggawas? Di matanggong sila sa sulod.

Mas motaas ang ilang bayranan. Mamintaha ra ba usab kining ubang mga motel. Wagtangon nila ang ilang promo nga P199 short time. Mauwaw pod intawon ang managhinigugmaay o magti-ayon nga maglakaw lang. Giawhag sa LTFRB ang mga motel operators nga mopakita og kooperasyon ning maong Oplan. Aw, daghan gyud madakpan ani. Kon daghang dri­vers ang madakpan ani, mas daghan pod siguro nga mangabunggo nga mga mister nga mga dukirok.

Kuyaw kon ang mga asawa sa mga bana nga wala mopauli anang gabhiuna mokuyog sa operasyon sa taga LTFRB, daghan sakpan.

BADLUNGON

Bitaw porbidang daghana pod ning taxi drivers nga mga siaw. Dili lang diha sa mga motel mo-overcharge. Wala pa gihapon masumpo kanang uban diha sa pantalan. Daghan gihapon diha ang manglubag. Kanang sabot-sabot nga dili mogamit og metro. Diha sa terminal. Dili hinoon tanan ha. Kay naay uban mga taxi operator nga istrikto pod pag-ayo. Kanunay nilang pahimangnoan ang ilang drivers nga dili magbinoang. Kay kon duna moreklamo nga gilubag sila o gitinuntuhan sa driver, aw, papha dayon. Mao nga magkinto gyud na sila. Pero naa gihapoy uban nga molikoy. Ang rason ra ba nila nga hinuwat unya pangayoan pa sila sa taga ports authority.

Diha bitaw taga GMA 7 Palawan niabot nganhi gikan bakasyon sa Dumaguete City. Gikan sa pantalan paingon sa Warerfront Hotel gipangayoan og P300. Nanawag nako buntag sayo. Akong gi-estoryahan ang driver. Ingon dayon ang driver, “Aw, imo diay ni amigo, Super
Bob., metro lang mi.” Tan-awa rag unsa ka kolokoy.

(bobby.nalzaro@yahoo.com)