Obenieta: Pagpaila batok sa panuway

Friday, February 3, 2012

NAA'Y gitawag ang mga Tagalog sa tawo nga gisudlan og yawa.  Kanang “masapian,” ay,
kuyawan sila ana! Dili sama natong mga Bisdak nga langit gyod ang paminaw kon mag-awas ug mosgwak atong sapi. Pastilan, maayo tingali nga atong hinumdoman pag-usab ang panultihon kon magpanilap ta sa kahangol pagbahandi: Money is the root of all evil.

Kanang sapi kuno mao’y gamot sa tanang demonyo.

Have something to report? Tell us in text, photos or videos.

Daghang pamaagi—tina­rong kun tinunto—aron masapian.  Alang sa kaugalingong kalamboan, naa’y magdiniyos og pasingot taman sa ginhawa. Ug, pwera buyag, lagmit labing daghan ang wala’y kahadlok magpataas sa ilang sungay samtang mogimok ang kahait sa kuko sa ilang pagkawkaw bisan sa dili ilaha.

Kon hisgotan nato ang mga kawkawan, ay, wala’y lalis nga apilon dayon nato pagpasangil ang mga politiko. Wa’y labot sa mga ligdong—nga sayon ra tingali iphon sa atong kamot—dayag nga labing daghan ang duna’y dagway nga ang gibag-on sama ra pod sa ilang bulsa. Aber, kinsa pa man diay ang una natong basolon kabahin sa pagkaut-ot sa atong nasod bisan pa’g kini gitugyanan sa Kahitas-an og buhong nga kinaiyahan dugang sa kaalam ug kakugi sa katawhan?

Bitaw, dili malilong nga ang atong mga sinaligan nga mangalagad unta sa kagamhanan sagad mao ra po’y nangunay paglabni sa atong pagsalig nila nga mao’y magpasiugda sa atong kaayohan, labi na kon buligan nato sila sa atong pagpaluyo atol sa piniliay. Ay, tataw bisan sa buta nga dako’g kabahin ang kagwang nga politika nganong dali kaayo ang paglingo-lingo kon pamalandongan nato atong katilingbanong kahimtang.

Dili na kinahanglang mangugat pa ta kon kinsa’y nabulahan samtang pabiling nagamos sa kalisod ang kadaghanan. Sayon ra ang pag-ila kon kinsa’y padayong gapabusdik sa ilang tiyan samtang naglunop ang naumod pagkamang sa kagutom ug samtang napugos ang uban sa kakha-tuka nga pagkumkom sa balaod. Dili na kinahangla’g pusta kon kinsa mao’y mosaad na pod og nga motagbaw sa atong panginahanglan samtang gakaduol na pod ang piniliay sa 2013 puhon.

Kabahin sa politikanhong pisik sa laway, nadunggan nato ang gipadayag sa usa ka abogado ug politiko bag-ohay lang. Angay nga ibutyag sa mga gahinambid paglingkod diha sa kagamhanan ang ilang bahandi kun statement of assets, liabilities and net worth (SALN) aron mahibal-an kini sa katawhan, matod pa ni Aristotle Batuhan.

Iyang gihisgotan ang kamahinungdanon sa mga opisyales nga mahimong tulobagon ug tataw—magbaton og “accountabi­lity” ug “transparency,” sa Inenglis pa—kabahin sa ilang kabtangan ug kinitaan. Niining paagiha tuod makita nato kon kinsa’y nikalit lang og kadato sukad gipiyalan sa mga botante aron mangatungdanan.

(geemyko@gmail.com)