Nalzaro: Ambisyon ni Gwen, hambog ni Tomas

Saturday, February 4, 2012

GIBUTYAG na ni Gob. Gwen­dolyn Garcia ang iyang mga plano sa pulitika human matapos ang iyang termino sa 2013. Aduna silay tulo ka mga alternatibo. Una, modagan siya pagkabise gobernador. Ikaduha, nga magpapili siya sa pagkakongresista. Pero ambot kon asa nga distrito. Ikatulo, mao nga magpapili siya sa pagkasenador. Ug ang ika-upat mobalik siya sa iyang pribadong kinabuhi. Kining ika-upat mao kini ang lisod nga himuon ni Gwen gumikan kay nakatilaw naman god siya sa paghawid og gahum. Kon makatilaw god ang usa ka  tawo, mahigam naman god.

Dili na ordinaryong tawo si Gwen. Dili na siya ang ordinaryong asawa sa usa ka Codilla didto sa Ormoc. Dili na siya ang kanhi Gwen nga maoy executive assistant sa iyang amahan nga si Pablo Garcia nga mao ang gobernador kaniadto. Siya na si Gwendolyn ang unang babayeng gobernador. Siya na ang giilang labing gamhanang pulitiko ning maong bahin sa nasod.  Kon mobisita siya nagkalain-laing lugar, hatagan na siya og red carpet reception. Hatagan na siya og VIP treatment. Iya nang nahimamat ang mga gamhanan ug mga impluwensiyadong mga tawo dili lamang dinhi sa ato ingon man sa gawas sa nasud. Unya mobalik si Gwen sa pribado ug ordinaryong kinabuhi? Estoryaheeee.

Have something to report? Tell us in text, photos or videos.

MGA PLANO

Kon modagan man pagkabise gobernador si Gwen, posible nga ang iyang amahan maoy modagan sa pagka-gobernador. Walay laing reserve ang mga Garcia karon nga maayong materyal sa pagkagobernador. Si third district Rep. Pablo John Garcia morag lisod pa kay dili siya expose sa entiro lalawigan. Unya ang anak ni Gwen nga si Abogada Christina Codilla Frasco mao usab. Nawala man gani karon siya sa Kapitolyo ug wala nay media exposure. Ang isyu batok ni Noy Pabling mao ang iyang pangidaron. Apan lantip pa man gihapon ang iyang panghuna-huna.

Okey sab kon modagan si Gwen sa pagkakongresista kay maayo man siya motabi ug articulate. Kana bang makamao mohan-ay og unsay i-estorya. Kining iyang planong senador, maoy tungason kaayo. Wala pa siyay exposure sa tibuok kapupud-an. Lisod kaayo ni kay mogasto pa siya og dakong kantidad aron iyang malibot ang tibuok nasud aron mapa-ila niya ang iyang kaugalingon sa mga botante. Pilde man gani ang ubang mga television and showbiz personalities nga ilado na. Siya pa kaha? Matod pa sa iningles nga ‘Gwen is entitled to her own entertaintment’.

HINAMBOG

Sa iyang pagdeklarar nga modagan siya pagka-mayor sa 2013 elections, naghinambog dayon si south district Rep. Tomas Osmena nga iyang lisud-lisuron si Mayor Mike Rama sa pagkuha og mamahimo niyang runningmate ug line up sa konseho. Sus, si Tomas morag siya ray tawo ug tag-iya sa Sugbo. Morag siyay franchise holder sa Cebu. Ngano god intawon nga maglisod si Mike? Daghang mga interesado diha mga magpapili sa pagkabise mayor ug ingon man konsihal. Nagtuo si Tomas nga siya na ang labing gamhanan ning dakbayan. Ato siyang pahinumduman sa estorya sa Bibliya nga ang kusgan ug higanteng si Goliath gipatay lang sa batang si David ginamit ang tirador. Amen.

(bobby.nalzaro@yahoo.com)