Mongaya: Dunay punto si Lito Lapid

Tuesday, February 7, 2012

LINGAWA dihang nikalit sa pagtindog si Senator-juror Lito Lapid aron motingog atol sa impeachment trial sa miaging semana. Wa makapugong ang pipila sa pagpangatawa kay sa katapusan, nihawa na gyud si Lapid sa committee on silence.

Ug nangutana siya unsay kalainan sa cash advance ug utang.

Have something to report? Tell us in text, photos or videos.

Kahinumdoman, gihisgu­tan sa impeachment court niadtong tungora ang P11 milyones nga cash advance nga gitaho ni Chief Justice Renato Corona sa iyang statement of assets, liabilities, and networth (SALN) sa 2003.

Nagpaguwa ang prosekusyon og mga ebidensya nga kining P11 milyones gipa-advance o gipautang sa kompanya sa pamilya sa iyang asawa nga ang Basa-Guidote Enterprises posible nga inimbento lang kay niadtong tungora, gi-revoke na ang incorporation sa maong kompanya diha sa Securities and Commission (SEC).

Di mo mahibulong nga mag-libog si Lapid kabahin sa cash advance ug loan. Kon cash advance man gud, akong pagsabot nga dunay paabuton si Co­rona nga dakong kantidad a­pan di pa dayon. Busa, iya kining gi-advance.

Apan diha sa iyang ubang mga SALN, iya man diay nga gibayaran. Busa makalibog kon cash advance ba ang gidawat ni Corona sa tuig 2003 ug iyang nakumpleto sa pagbayad dihang
niabot ang 2010. Di ba kon estrikto natong tukion, loan kini ug di cash advance?
Mao nga nakaingon ko nga dunay punto si Sen. Lapid.

Tingale makaingon kita nga sigi na lang na kay basin nasipyat ang Chief Justice sa pag-fill up. Ah, masipyat diay ang labing dakong opisyal sa Hudikatura nga maoy labing taas nga opisyal nga mokukom sa uban kon duna say mga kuwestyon kabahin sa ilang SALN.

Masipyat sab diay ang usa ka tawo nga nikuhag masters of taxation and corporate law sa Harvard University. Masip-yat diay og ingon niini ang usa ka eksperto sa taxation ug corporate law nga nakatrabaho sa duha ka mga banko ug sa SGV corporation sa wa pa mosulod sa kagamhanan.

Taym sa, nasipyat siya o gituyo lang alang sa paglipat-lipat sa uban?
Samtang naglibog kita la­kip kang Sen. Lapid niini, nagsigi sa pag-insister ang depensa nga gipangulohan ni kanhi justice Serafin Cuevas nga di kinahanglan ang maong mga ebidensya.

Sa laing bahin, nangutana ang mga senador-juror nga di ba mahimo nga ang usa ka kompanya nga na-revoke ang mga papeles magpadayon sa pagnegusyo ug makapa-utang.

Naghisgot man sab gud si Cuevas nga nakabaligya ang maong kompanya og yuta ngad­­to sa Quezon City nga mobalor og P34 milyones.

Ang nakaapan kay kon sakto ang mga senador nga mahimong makautang si Corona sa maong kompanya kon duna kiniy kwarta, di man legal ang maong transaksyon kay gidid-an na man kini sa SEC.

Buot ba ipasabot nga mahimong makautang ang usa ka Chief Justice og minilyon gikan sa usa ka korporasyon nga ilegal na? Unsa may kalainan niini sa usa ka ordinaryong em­-pleyado sa kagamhanan nga niutang og 5-6?

Unta, ang Chief Justice maoy mag-una nga moseguro nga ang kompanya sa pamilya sa iyang asawa molimpyo una sa record sa SEC usa pa mangutang?

Makaingon ba kita nga sip­yat lang sab kini ug mahimo lang pasayluon?

Kahinumdoman sab sa mao gihapong hearing nga niingon kini si Cuevas nga ang mga sipyat sa SALN sama sa wa pagtaho sa mga kabtangan nga minilyon o pagbutang og sayop nga mga bili mahimo mang korehian ug, kon di tinuyo, ma­hi­mong pasayluon.

Tingale, kon ang nasipyat usa ka ordinaryong empleyado kay way eksperto nga makatabang kaniya. Apan si Corona usa ka batid sa taxation law ug corporate law. Nakahibawo siya unsay legal ug ilegal.

(politika2013.wordpress.com)