Nalzaro: Relax lang kon dunay linog

Tuesday, February 7, 2012

MAO pa gyuy pagparking nako sa GMA 7 complex sa Nivel Hills, Apas gikan ko nagkuha sa akong Pajero sa Mitsubishi Office sa Mambaling kay akong gipaayo sa dihang mitay-og ang yuta gumikan sa linog nga miigo sa Sugbo ug ubang bahin sa Kabisay-an mga 11:49 kagahapon sa udto. Abi ba nako og mikurog ang akong sak­yanan kay adunay laing depekto. Mora kog nagsakay og sakayan nga bawuron.

Ako na lang nabati-an ang akong mga officemates nga naninggit ug nanagan pagawas sa building. Kusog-kusog daw ang tay-og sa among duha ka andana nga building nga aduna pay underground. Ang mga okupante sa City Lights condominiums nga among sili­ngan naninggit usab ug mo-umbaw sa veranda sa taas kaayo nila nga building. Dugay-dugay ang pagtay-og.

Have something to report? Tell us in text, photos or videos.

EPICENTER

Diri ra  Region 7 ang epicenter sa maong 6.8 magnitude nga linog miapektar sa Dumaguete, Negros Oriental, Bohol ug tibuok lalawigan sa Sugbo. Apil man gani ang pipila ka bahin sa Metro Manila. Adunay mga buildings nga nag-crack. Suspendido ang klase sa ubang mga private schools. Maayo nalang gani kay wala makamugna og dakong danyos ingon man walay kinabuhi nga nakalas. Pasalamat ta sa Labaw’ng Makagagahum.

Suwerte lang gyud ta dinhi sa Pilipinas kay ma-igo man gani sa linog pero gamay ra ang danyos gawas niadtong miigo didto sa Baguio niadtong sayong bahin sa dekada 90. Hugno ang mga buildings ug daghan ang nadat-ugan. Pero sa ubang nasud sama sa Japan, New Zealand, Bangladesh, Africa grabe ang ilang kasinatian. Pun-an pa ug tidal wave usahay.

DI MATAGNA

Bisan pa man kon advance na kaayo ang atong siyensya ug teknolohiya apan wala pa  gyud ma-imbento ang usa ka butang nga maka-detect nang daan sa linog. Ang bagyo, pag-ulbo sa bulkan ug baha ato naman nga mabantayan. Pero ang linog wala pa gyud. Walay warnings. Mao nga andam gyud ta kanunay ug magmatngon inig abot ning maong kalamaidad.

Una. Kon anaa ka sulod sa building mogawas lang ta dayon nga dili magpanic. O ba kaha motago lang ta ilawom sa lamesa aron dili kita ma-igo sa mga tipaka sa na-crack nga building. Magpalayo sa tag-as nga building kay hayan matumpag dili kita madat-ugan.

Aw, kon maabtan nga mahugno ang building unya toa ka sa sunod dimalas la gyud. 

Kanang  earthquake drill sa mga tinun-an ug mga empliyado importante baya na. Relax lang kon adunay linog dala ang pag-ampo.

(bobby.nalzaro@yahoo.com)