Barrita: Onus probandi

Wednesday, February 8, 2012

SA Iningles, mao kini ang gitawag nga burden of proof, kinsay dunay obligasyon sa pagpruyba sa alegasyon.

Sa usa ka kaso (People versus Subingsubing), ang Korte Suprema niingon, It is fundamental in criminal procedure that the prosecution has the onus probandi in establishing the guilt of the accused, as a consequence of the tenet, ei incumbit probation dicit, non que negat, which means that he who asserts, not he who denies, must prove.

Have something to report? Tell us in text, photos or videos.

Sa usa ka kasong kriminal, ang prosecution mao ang namasangil nga ang sinumbong o akusado nakahimog kalapasan sa balaod. Ang sinumbong o akusado igo lang nga mohimakak niini. Kay kon iya kining angkunon, di na kinahanglan pang bistahon, gawas kon kini usa ka capital offense diin gimandoan ang hukmanan sa pagsusi sa gibug-aton sa ebidensya batok sa akusado.

Sa ato pa, ang prosecution nga maoy namasangil maoy dunay obligasyon nga probahon sa hukmanan nga nakahimo kalapasan sa balaod ang akusado.

Sa nagpadayon nga bista sa kasong impeachment batok ni Supreme Court Chief Justice Renato Corona, ang House prosecution panel maoy dunay obligasyon sa probahon ang mga articles of impeachment batok kang Corona. Kon magkasumong-sumong sila sa pagpresentar sa ilang mga ebidensya, di nila mabasol ang depensa kon di nila maprobahan ang ilang mga alegasyon.

Evidence aliunde

Sumala pa sa Korte Suprema (Bocobo versus Comelec), Evidence aliunde is evidence other than the real or physical evidence itself, or evidence from a different source.

Sa ato pa, kon gusto nimong probahon nga dunay deperensya ang usa ka dokumento, kinahanglan nga mopresentar ka og ebidensya gawas sa maong dokumento.

Pro bono

Minugbo kini sa pro bono public, for the public good. Sa naandan, kon ang usa ka abogado moserbisyo sa usa ka kliyente nga way bayad, gitawag kini nga pro bono.

Gikwestyon karon ni kanhi senador Rene Saguisag ug ni  Rep. Rudy Farinas, usa sa mga House prosecutors, ang libreng serbisyo legal nga gihatag ngadto ni Chief Justice Corona sa mga abogado sa depensa, sama ni retired Associate Justice Serafin Cuevas, nga mga abogado de campanilla.

“Under Rule 504 of the Code of Judicial Conduct, a judge or any member of his family shall not accept any gift or favor,” niingon si Saguisag.

Apan sumala pa ni Senate President Juan Ponce Enrile, dunay katungod si Corona nga labanan sa usa ka abogado, ang right to a counsel of his own choice, libre o binayran.

(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya  gikan sa ala-una ngadto sa alas dos sa hapon sa sibyaan DYSS Superadyo sa RGMA network.)

(Sa mga reaksyon kang Atty. Eddie O. Barrita: E-mail: edbarrita@yahoo.com;  Cell # 09165805285; Room 201, 18 Cherry Court Bldg., Gen. Maxilom Ave., Cebu City )  # # #