Durano: Tinubdan sa kalisang

Wednesday, February 8, 2012

HUMAN sa 6.9 magnitude nga linog nga mitay-og dinhi sa Sugbo niadtong Pebrero 6 sa udto, dali nga mibanos ang tumang kalisang sa katawhan tungod sa Tsunami Alert level 2 nga gipakanaug sa Phivolcs (Philippine Institute of Volcanology ang Seismology) nga giduyugan usab sa mga iresponsableng mga text messages nga dali kaayong mikatap.

Kini ang gidugangan pa sa mga walay lingaw natong mga kaigsoonan nga nagpunay’g siyagit sa mga kalsada nga gilamoy na sa tubig ang tibuok downtown area sa dakbayan sa Sugbo ug nga kusog kaayo kining nga nakasaka. Mao nga ang bugtong kaluwasan ra gyud mao ang pagdagan sa mas taas nga mga lugar susama sa Busay ug Kalunasan.

Have something to report? Tell us in text, photos or videos.

Daw susama sa salida ang masaksihan nga nag­pun­sisok ang mga Sugbuanon sa mga kalsada. Nisamot ang problema sa trapiko human ang mga nagdala sa ilang mga sakyanan ang namiya na lang sa ilang mga gipangmaneho tungod sa kahadlok nga mahi-abtan na sila sa tsunami ug nga mikuyog na lang sa pagdagan sa bagang duot sa katawhan.

Bisan og gilibkas dayun sa Phivolcs ang Tsunami warning mga pasado alas dos sa hapon sa susamang adlaw, apan daghan gihapon sa mga Sugbuanon ang gustong maneguro ug dala ang tibuok miyembro sa pamilya ug banay ang didto namakwit sa mga bukirang barangay dinhi sa Siyudad aron adto nalang magpalabay sa kagabhion.

Apan kita mapasalamaton sa gihapon nga bisan pa man sa kahasol ug kapurhisyo nga atong nasinati tungod sa pagka-panic sa katawhan mugna sa tsunami scare, wala’y kinabuhi nga nakalas o nagrabehan sa pagkaangol dinhi sa Sugbo human sa pagtay-og sa kusog nga linog.

Pero sa mao natong kasinatian, ako nanghinaut nga masabtan unta sa mga anaa sa katungdanan og sa kinabag-an sa atong katawhan nga ang ensaktong inpormasyon atol sa bisan unsang kalamidad ang posibleng makaluwas sa kadautan sa atong mga kaigsoonan.

Dayag kaayo nga dunay kakuwangan sa Phivolcs sa pagpasabot sa publiko nga wala’y kahigayunan nga maapektuhan sa tsunami ang Metro Cebu kay ang linog anaa man sa habagatang kasadpan nga habig nga nag-atubang sa Negros Oriental ug nga bisan og motumaw pa ang Tsunami, maigo lamang ang Metro Cebu kon makalabang ang tubig sa dagat sa buko-buko sa bukid sa Balamban.

Mao nga aron kalikayan ang pagtumaw na usab sa kalisang sa katawhan, angayang magbutang na ang kagamhanan og dali og epektibong pamaagi sa pagpadangat sa ensaktong mensahe ngadto sa katawhan. Aron sila ang masayud sa tinud-anay nga kahimtang og magiyahan sa angayang mga pagabuhaton. Imbis nga mag-iyahay og dagan sa mga kalsada nga wala gani masayod kun asa sila padulong.