Editoryal: Ang tsunami sa Phivolcs

Wednesday, February 8, 2012

GIBASOL ang Philippine Institute of Volcanology and Seismology (Phivolcs) nga maoy usa sa mga hinungdan sa pagka-panic ug katarantar sa mga tawo niadtong Lunes, pipila ka oras human miigo ang linog sa Kabisay-an ug Mindanao.

Human sa 6.9 magnitude nga linog, ang Phivolcs yano kaayong mipagawas ug mideklarar nga ang Sugbo ipaubos gilayon sa “Tsunami alert level 2.”

Have something to report? Tell us in text, photos or videos.

Kining maong pagdeklarar maoy gitumbok nga nakapalisang sa kinabag-ang Sugboanon kay tiaw mo bay naghisgut na man og tsunami.

Lab-as pa sa panumdoman sa katawhan ang nahitabong tsunami didto sa Fukushima, Japan niadtong Marso sa miaging tuig diin makita ang mga higanting bawod nga milampornas ug mikusokuso sa mga balay ug edipisyo sa maong dapit pipila ka gutlo human sa linog.

Ang mapintas nga trahedya mikalas usab og liboan ka mga kinabuhi sa tawo ug tungod ning maong hitabo nakulit na sa alimpatakan sa kadaghanan kon unsa ka bangis ang tsunami.

Ang pagpahibawo sa Phivolcs nga ang Sugbo ubos na sa alert level 2 nakapasamot sa kalisang sa mga tawo kay wa may masayod kon unsa ning level 2. Ang pagtuo sa katawhan nga ang tsunami bangis kon kini moigo na sa bisan asa nga dapit.

Sa wa pa unta mopagawas ang Phivolcs sa ilang advisory, ila untang gihunahuna kon di
ba makadaot ang ilang ipamahayag ilabi na kay kini sensitibo sa publiko.

Ang gihimo sa taga Phivolcs nakahatag og dugang kadaot sa Sugbo, kay gawas sa tukmang kalisang, daghan usab nga nangaalkansi sa ilang negusyo. Dunay mga nagkabag-iray nga mga sakyanan, mga tindahan nga gipangbiyaan ug mga mall nga gipangsirhan.

Kini maoy epekto sa tsunami sa Phivolcs.