Barrita: Hay salamat, way tsunami!

Thursday, February 9, 2012

KAMO bay kuyawan, la­lim ba?

Mao ni ang sentimiento sa tanang gianod sa kusog nga bul-og sa kakuyaw tungod sa nikatap nga sayop nga taho nga naigo na sa tsunami ang syudad sa Sugbo niadtong miaging Lunes sa hapon human sa 6.9-magnitude nga linog nga nitay-og sa Sugbo ug Negros Oriental.

Have something to report? Tell us in text, photos or videos.

Pero salamat na lang nga way tsunami nga niabot.

Ginaingon nga unya pa kita manguros og gikilatan na. Pero, unsa, kapoy sab ning
managan ta unya wa diay tsunami no?

***

Usa ka video nga gi-post sa YouTube nga nakuha gikan sa taas nga building nagpakita sa mga tawo nga morag mga hulmigas nga nanagan palayo sa downtown area padung sa mga bubungatod nga lugar.

Mga tindera sa Carbon Market ug sa dalan Colon namiya sa ilang mga stalls. Mga piniriso sa Carbon Police station nagpakiluoy nga pagawson sa mga pulis. Minatay nga iglulubong gibiyaan sa mga buhi pa nga molubong unta niya. Drayber sa taxi nga nagkaon niapil na lang og dagan pagkakita niya nga daghang nanagan.

Hilabihang daghana sa nanagan. Ang uban niabot sa Barangay Busay ug Kalunasan.

Matawag kadto nga labing unang Tsunami Fun (Panic?) Run.

***

Nganong way tsunami nga niigo sa syudad sa Sugbo? Tungod kay way tsunami.

Sumala pa sa mga eksperto, wa pay natala nga tsunami nga miigo sa Sugbo tungod kay ang atong isla nasalipdan man sa ubang mga isla.

Pero ang mga coastal areas, labi na niadtong nanagpuyo diha mismo sa ngilit sa dagat, kinahanglang mangandam sa paghampak sa mga dagkong bawod ug sa pagsaka sa dagat nga sagad mahitabo kon maatol nga motaub ang dagat ug dunay dagkong mga baha.

Busa, bisan pa kon duna tay natural nga depensa sa tsunami, angay gihapon nga mangandam sa kalit nga pagsaka sa dagat o kaha, sama sa salida sa sine, kon dunay matagak nga dakong meteor o asteroid.

***

Nganong gihakop ang mga Sugbuanon sa kalisang?

Tingali ang hinungdan mao ang pagsigi natog tan-aw sa mga footage sa tsunami nga niigo sa Japan nga lab-as pa kaayo sa atong mga panumdoman. Nadugangan pa gyud sa dagkong baha nga niigo sa mga syudad sa Cagayan de Oro ug Iligan.

Pun-an pa sa duha ka tawo nga nagsakay og motorsiklo nga nagsigig siyagit og tsunami.

Ang labing klaro mao nga human sa pagtay-og sa linog, wa ta mopadayon sa pagmonitor sa mga taho sa radio aron masayran ang mga tarong ug opisyal nga mga bag-ong kalamboan.