Durano: Anino sa kalsadang tul-id

Thursday, February 9, 2012

SAMTANG nalingaw ang katawhan sa kaulohan sa impeachment drama ni Chief Justice Renato Corona unya gihubag-hubagan pa sab kitang mga bisaya sa kalisang nga mugna sa linog ug sa panagway sa tsunami nga wa gyung miabot, bugtong nagpabilin nga wala gyu’y kausaban mao ang pag-antos sa kalisdanan sa kinabag-an sa atong katawhan.

Sa natala nga gross domestic product output sa nasud alang sa tuig 2011, mikibra kini ngadto na lamang sa 3 porsiyento gikan sa 7 porsiyento sa 2010. Unya daghan usab sa atong kaigsuonan ang nag-ingon nga nimenos ang ilang kakabus apan misaka ang gidaghanon sa panahon ug kahigayunan nga sila gipanggutom ug wala na gyu’y makaon.

Have something to report? Tell us in text, photos or videos.

Ang lubad na kaayo nga mga palusot nga atong madungog mao nga dili madali ang proseso sa paghaw-as sa kalisdanan sa atong katawhan ug ang atong nasaksihan karon nga mga pagpanglutos sa kanhi mga nangatungdanan ang tilimad-un sa taliabot na unya nga kalingkawasan sa mga Pilipino gikan sa pila na ka henerasyun nga talikala sa pagkamusimos.

Samtang ako nagatoo nga gikinahanglan sa atong nasud ang pagpanglimpyo sa makinarya sa kagamhanan arun tinud-anay gyud nga kapuslan sa katawhan ang dinuga nga ilang natampo sa atong nasudnong panudlanan, apan wala na kinahanglana pa nga humanon usa ang impeachment ni Corona ug sentinsyahan usa si Kongresista Gloria Macapagal Arroyo aron magsugod na kita sa pag-abante ug sa pag-asenso.

Labaw na nga dili kita angayang maghuwat sa 2016 aron masayod kon magmalampuson ba kita o masugamak lang gihapon sa kapakyasan? Pinaagi sa pagtan-aw lamang sa policy directions sa Aquino administration, ato ng mahukman ug makitang daan ang seguradong resulta nga atong makuha.

Sa nag-unang batakang panginahanglan sa pagkaon, gitugutan sa gobyerno ang pagpaabang sa 10 mil hektaryas nga yuta sa Davao del Norte ngadto sa Bahrain arun magseguro ang food security sa ilang mga konstituente.

Ambot og kuwang lang ba gyud kita sa usa ka paruk arun mo-andar na sa pagsugod ang atong mga utok. Sige ta’g hatag og bilyunes nga limos sa mga kabus nga nagtudlo lang kanila sa pagkatapulan nga mahimo man diay nga makab-ot ang food security sa laing nasud, dinhi sulod mismo sa atong tugkaran.

Ako nanghinaut nga malamdagan na unta ang alimpatakan ning nagdala sa manobela sa kalsadang tul-id, aron mawagtang na ang anino sa kawala’y kasayuran kon asa ang tinud-anay nga agianan sa gipangandoy ta nga tingusbawan.