Editoryal: Masuko man

Thursday, February 9, 2012

NASUKO na ang mga konsehal sa dakbayan sa mga department head nga nangreklamo nga gamay ra sila og mahimo tungod sa budget cuts epek­to sa pagbasura sa budget nga giduso ni Mayor Michael Rama alang sa 2012.

Niadtong miaging adlaw, gilabhan og kasaba si Department of Public Services Chief Dionisio Gualiza sa mga konsehal nga nasuko tungod sa iyang pamahayag kalabot sa pagtibhang.

Have something to report? Tell us in text, photos or videos.

Kay duna may gidusong budget ang matag departamento sa City Hall alang sa operasyon ug uban pang mga panginahanglan, natural lang nga maapek­tuhan ang ilang mga plano kon kini gitibhangan.

Ang City Health Department nibutyag sa mia­ging buwan nga mominos gyud ang mga serbisyo nga ilang mahatag, sama sa pagpanuli sa mga bata matag summer, tungod gihapon sa budget cuts.

Kinsa man diay ang angay basulon ning pagtibhang sa budget? Wa may laing nitibhang ug niaprobar niini, ang konseho ra man sab.

Gikuwentada na sa matag departamento ang ilang budget alang sa maayong paghatag og mga serbisyo ngadto sa mga taga dakbayan sa Sugbo.

Wa kana nila gi-magic aron lang magpa-pogi points ngadto sa katawhan ingon man sa mayor.

Kay sila man ang manubag kon mapalpak ang serbisyong gisangon kanila, naandan lang nga mopasidaan sila daan ngadto sa katawhan.

Tubagon sa mga konsehal og tagsa-tagsa ang isyu, tinuod ba kini o di. Mangaway na man hinuon.