Nalzaro: Panaghiusa panahon sa katalagman 

Thursday, February 9, 2012

KON inyong nakita sa mga hulagway sa pamantalaan ni­adtong nahitabong tsunami scare o pagka-panic sa kataw­han gumikan sa huhungihong nga adunay ma-igo nga tsunami human miigo ang 6.9 magnitude nga linog, ang katawhan misaka sa taas-taas nga lugar. Ang uban nagpabukid aron maluwas sa katalagman. Ang uban nangatkat sa taas nga building.

Ang taga Pahina Central diha sa taas sa  Cebu City Medical Center (CCMC).

Have something to report? Tell us in text, photos or videos.

Ang uban didto magtapok sa nagkalain-laing skywalks ug flyovers kay aron masiguro nga dili sila malumos. So, kining mga skywalks ug flyovers makatabang diay ni dili lang sa pagsulbad sa kahuot sa dagan sa trapiko. Makatabang diay ni panahon sa baha ug tsunami. Busa atong awhagon si kanhi north district congressman Raul Del Mar ug ang iyang anak nga maoy kasamtangang representante sa norte nga si Cutie Del Mar nga magtukod og daghang skywalks ug flyovers aron ta masalbar sa lunop ug tsunami. Bwahaha!

KADAOT

Dako og kadaot nga namugna ang maong linog sa pipila ka mga lugar sa Negros Oriental labi pa sa dakbayan sa Guihulngan ug mga lungsod sa Jimalalud, La Libertad ug Tayasan.

Nangagusbat ang mga karsada. Putol ang elektrisidad og mga water pipelines. Nihit ang mga pagkaon kay sirado ang mga tindahan. Wala kaayoy tawo ang kinapusuran sa lungsod kay ang uban toa namakwit sa bukid gumikan sa kahadlok nga aduna pay lain nga mas kusog nga linog nga moigo ingon man ang tsunami.

Daghan pang mga patay ang wala maugkat human kini natabunan sa midahili nga yuta.

Gibana-banang mosobra pa sa usa ka gatos ang patay. Dili maagian ang mga kalsada kay nangliki ug nangaguba ang mga taytayan.  Maabtan pa og dugay nga panahon ug mogasto pa og binilyon ang kagamhanan usa makabangon ang maong mga lugar gikan sa pagkadistroso niini gumikan sa maong kalamidad. Sakit man tuod, pero wala kitay mabasol kay pagbuot man kini sa Labaw’ng Makagagahum.

PAGPAKABANA

Mao ra usab kini ang nakanindot kay matag panahon nga motumaw ang kalamidad, magkahi-usa ang katawhan. Dinhi sa Sugbo, ang nagkalain-laing local government units, mga ahensiya sa kagamhanan ug mga media outlet mihimo dayon og relief operation alang sa pagtabang sa mga nabiktima sa lunog. Ug salamat kay daghan kaayo usab ang miresponde.

Gani nakapadala na ang uban og pasi-unang hinabang didto. Dili pa lang dugay, sa dihang na-igo usab og kalamidad ang Cagayan de Oro ug Iligan, ato usab nga gihimo ang susamang kalihukan. Ug salamat sa katawhan nga nagpakabana, naa ang panaghi-usa panahon sa katalagman.

(bobby.nalzaro@yahoo.com)