Albor: Kapugngan pay sungayng kabaw

Friday, February 10, 2012

TULO nalang ka pagpanambo sa haring adlaw nga mogilis og kahayag sa nipis nga aping sa sidlakan “Valentine’s Day” na. Selebrasyon sa matag tuig sa gugma ug pagbati.

Ubos sa ngalan sa usa ka Christian Martyr nga si Saint Valentine ug giistablisar ni Pope Gelasius I niadtong 496 A.D., ang atong gisaulog nga adlaw ni Valentina ug Valentino gipapas sa Roman Calendar of Saints niadtong 1969 ni Pope Paul VI.

Have something to report? Tell us in text, photos or videos.

Apan ang managhigugmaay mopahungaw sa ilang gugma matag Pebrero 14 pinaagi sa paghatag og mga bulak, motanyag og matam-is nga mga butang ug mopadangat og mga Valentine’s card uban sa mga mensahe nga hinukad sa kahiladman. Mo­der­­nong simbolo mao ang hulagway sa kasing-kasing, langgam nga pati ug ang galamhan nga natuhog ug nalapsan sa pana ni kupido.

* * *

Kalibotanong pulong ang gugma mao nga halapad kini og kahulogan. Ang gugma sa magkaatbang nga binuhat kapugngan pay magsungayng kabaw. Daghan ang nakabsan sa kusog sama sa nahugno nga kasing-kasing ug kalag sa mga maisog nga sila si Napoleon Bonaparte ug Adult Hitler. Napukan ang kusog ni Samson tungod ni Delilah ug Julius Caesar gumikan ni Cleopatra. Laing mga matang sa gugma mao ang pangalagad sa publiko,
sa isigkatawo, sa pamilya ug sa mahal nga Makagagahom.

Apan sa mga ngilngig nga krimen ug sa politikanhong krisis ingon og natibhangan ang gugma nga nakulit sa kasing-kasing sa panahon ubos sa masakiton tang katilingban kay kanunayng makanlatan sa ting-usbawan.

* * *

Tataw nga makapakgang sa daling paghingpit sa gugma sa duha ka binuhat ang balaodnon nga matagaan og Marriage Contract kon makatanom og kahoy pinaagi sa sertipikasyon gikan sa City Environment and Natural Resources Office (Cenro).

Pastilan baya walay luna ang hunahuna sa gustong magminyo sa pagtanom og kahoy kondili ang pagmontar man og mohon aron dili mailog ang utlanan sa ilang panaghiusa. Wala say katamnan og kahoy dinhi sa siyudad sa Sugbo. Unsaon pagturok sa rosas sa aspaltadong kadalanan. Pwede hinoon magtanom og sibuyas sa kaang.

* * *

Pagkadali ra gud nga magminyo ang kabatan-onan sa probinsiya. Daling makat-on sa lambada sa kama. Mao nga dili mosalir bisag mapasar pa ang Reproductive Health Bill nga nagtumong sa pagminos sa anak. Kapugngan pay baha.