Durano: Pagusbat sa ‘bad record’

Friday, February 10, 2012

DAGHAN ang nabalaka ning gipakanaug nga Temporary Restraining Order sa Korte Suprema pabor ngadto kang Chief Justice Renato Corona nga nagpugong sa impeachment court sa pag-abli sa iyang mga dollar accounts nga mao na’y katumanan sa gikabalak-an nga constitutional crisis.

Kay mahimo naman unya nga wala’y nada ang proseso sa impeachment kun ang gikinahanglang mga ebedinsya nga angayang ipresentar og matuki ang hingpit ng mataguan og dili na gyud mahisayran. Kay kini ang giyak-an man sa Korte Suprema, pinasikad sa power of judicial review nga naghatag niini og sukaran sa pagpanghi­labot sa bisan unsang ahensya sa gobyerno nga nakahimo og “grave abuse of discretion, amounting to lack or excess of jurisdiction”.

Have something to report? Tell us in text, photos or videos.

Si Fr. Joaquin Bernas ang nagtuo nga wala’y nahimong pagpangyatak ang pinakataas nga hukmanan sa katungod og hurisdiksyun sa impeachment court kay igo man lang niini nga gihimo ang iyang papel nga maoy tigpadangat og interpretasyun sa mga probisyunes sa atong batakang balaud. Gani, dili man lang si Corona ang nakapahimulos ning maong injunctive power kun dili lakip na usab sila si kanhi Chief Justice Hilario Davide Jr. ug kanhi Ombudsman Merciditas Gutierrez.

Samtang, si Senador Francis Kiko Pangilinan ang mibaliwala ning maong TRO nga gipakanaug sa Supreme Court kay niya pa nga wala kini epekto og dili mamahimong makapanghilabot ang pinakataas nga hukmanan sa ekslusibong gahum sa impeachment court.

Pero kon atong tinud-anay nga ayagon, atong makita ang kamatuuran nga dili karun lamang nahimutang sa krisis ang atong konstitusyon og ang imahe sa hustisya og pamalaud ning atong nasud. Kay sa estorya pa sa mga yanong tawo sa pansitan, wala nama’y angayang ikabalaka pa nga maguba sa daan na nga bad record.

Gawas sa kaso ni Corona kansang nakuha karun nga TRO ang maghatag og kasayon sa mga kawatang mga opisyales sa gobiyerno og sa mga miyembro sa mga negusyong sindikato sa pagtago sa ilang hugaw nga salapi ngadto sa dollar accounts sa mga bangko arun dili na kini mahilabtan. Sibaw og basa naman kaayo sa publiko ang binaligyaay sa kaso og TRO sa ensaktong presyo gikan sa kinatas-an hangtud sa ubos nga mga korte, puwera lang sa nahibiling mga nagtinarong.

Mas maayo na usab seguro nga paundayunan kining mga tawhana sa pagtagbaw sa ilang pagkawalay-uwaw. Kun pinaagi man lang niini, atong masabot ang panginahanglan sa paglahugay na sa atong kinatibukang justice system sa nasud arun kini ang tinud-anay na unya nga magtimbang sa kaangayan pinaagi sa kamatuuran og dili kaysa yawan-ong impluwensiya sa salapi, gahum og bulawan.