Editoryal: Constitutional crisis mitumaw?

Friday, February 10, 2012

SA DAGAN sa impeachment trial sa Senado, misa­nga sa pipila ka isyu nga naglambigit sa kwestiyon bahin sa Batakang Balaud gawas mismo sa impeachment complaint batok kang Chief Justice Renato Corona.

Mitumaw na ang gikabalak-an nga constitutional crisis. Una nang gisalikway kini nga kabalaka sa prosekusyon.

Have something to report? Tell us in text, photos or videos.

Pananglitan, ang pagkuwestiyon sa ubang senador-huwes sa impeachment court bahin sa pagluwat og temporary restraining order (TRO) bahin sa pagbutyag sa publiko sa dollar account ni Corona, base sa R.A. 6426 o Foreign Currency Deposit Act of the Philippines.

Hinuon, ang Korte Suprema wala mopabor sa laing petisyon ni Corona sa pagpahunong sa impeachment trial.

Si Fr. Joaquin G. Bernas, S.J., J.S.D. ug dean Emeritus sa Ateneo Law School ug tinahod nga cons­titutionalist nga sakop sa pagpanday sa 1986 Constitution ug magsusuwat sa daghang mga libro bahin sa balaud nipasupot sa iyang mga kabalaka sa dagan sa impeachment trial — bahin sa limitasyon sa tulo ka sanga sa kagamhanan nga dunay “patas nga gahom.”’

Namatikdan ni Bernas nga bisan ang Senado nilingkod isip impeachment court dunay limitasyon o dili absoluto labi na sa paghubad sa balaud, kini human gikuwestiyon nila ang TRO sa Korte Suprema.

Ang paghubad sa balaud, sama sa R.A. 6426, nasakop sa gahom ubos sa Korte Suprema.
Samtang, giktaho nga Senado (impeachment court) mohimo og linaing tigom bahin sa ilang posisyon sa nahisgotang TRO.

Kini, pipila pa ka isyu gikan sa impeachment trial nga makaayo alang sa paghan-ay sa pangangamhan.

Maayo nga wa dayon mosibog si Corona sa iyang kaso aron maklaro ang tanan.